Жетісу облысында патрульдік полиция жүргізушілерге профилактикалық түсіндіру жұмыстарын жүргізді

Жетісу облысында патрульдік полиция қызметкерлері жүргізушілерге түсіндіру жұмыстарын жүргізді, – деп хабарлайды Polisia.kz.

Жетісу облысының патрульдік полиция батальонының қызметкерлері жол қозғалысы қауіпсіздігін арттыруға бағытталған профилактикалық іс-шараларды тұрақты түрде жүргізіп келеді.

Полиция қызметкерлері жол-көлік оқиғаларының негізгі себебі көбіне адам факторына байланысты екенін еске салады. Тәжірибелі жүргізушілердің өзі шаршаған күйде рөлге отыру, ұйқышылдық тудыратын дәрі-дәрмектерді қабылдау, ауа райы жағдайын елемеу немесе алкогольдік ішімдік ішкеннен кейін көлік басқару салдарынан қателікке бой алдыруы мүмкін. Сонымен қатар автокөліктің техникалық жай-күйі де маңызды рөл атқарады.

Профилактикалық жұмыстар барысында тәртіп сақшылары жүргізушілерге жол қозғалысы ережелерін қатаң сақтау және рөлде барынша мұқият болу қажеттігін түсіндіреді. Полиция қызметкерлерінің айтуынша, салондағы жарықтың қосулы болуы немесе назардың жан-жаққа ауып кетуі сияқты болмашы алаңдататын факторлардың өзі жол-көлік оқиғасына әкелуі мүмкін.

– Жолдағы қауіпсіздік әрбір жүргізушінің жеке жауапкершілігінен басталады. Бір сәттік немқұрайлылықтың өзі ауыр салдарға соқтыруы мүмкін. Жол қозғалысы ережелерін сақтау — бұл формалдылық емес, өз өміріңе және айналаңдағы адамдардың өміріне деген құрмет, — деп атап өтті полиция қызметкерлері.