Талдықорған қаласында қоғамдық жол қозғалысы қауіпсіздігін арттыру мақсатында полиция қызметкерлері профилактикалық іс-шаралар өткізді, - деп хабарлайды Polisia.kz.
Бұл жолы ерекше назар қоғамдық көлік саласына аударылды. Себебі автобус жүргізушісінің әрбір шешімі ондаған жолаушының өмірі мен денсаулығына тікелей әсер етеді.
Іс-шара барысында полицейлер қоғамдық автобустардың жүргізушілерінің денсаулық жағдайын, сондай-ақ көліктердің жолға шығар алдындағы техникалық жай-күйін мұқият тексерді.
Бақылау барысында:
-
міндетті медициналық тексеруден өтуі;
-
тежегіш жүйесінің жарамдылығы;
-
рөлдік басқарудың дұрыстығы;
-
жарық беру құралдарының жұмыс істеуі;
-
жолаушылар қауіпсіздігіне әсер ететін өзге де техникалық элементтердің жағдайы назарға алынды.
Қоғамдық көлік жүргізушісінің жауапкершілігі жеке автокөлік иесіне қарағанда бірнеше есе жоғары. Автобус тізгінінде – ондаған адамның тағдыры. Әрбір жолаушының қауіпсіздігі жүргізушінің кәсібилігіне, денсаулығына және жолдағы тәртібіне байланысты.
- Біздің мақсатымыз — тек бұзушылықтарды анықтау ғана емес, ең алдымен олардың алдын алу. Үздіксіз бақылау жолдағы тәуекелдерді азайтып, қала тұрғындарының қауіпсіздігін қамтамасыз етуге мүмкіндік береді, - дейді полиция қызметкерлері.
Профилактикалық іс-шаралар алдағы уақытта да жалғасын табады. Құқық қорғау органдары жүргізушілерді жол қозғалысы ережелерін қатаң сақтауға, көліктің техникалық жағдайын тұрақты бақылауда ұстауға және жолдағы қауіпсіздік баршамыздың ортақ жауапкершілігіміз екенін ұмытпауға шақырады.
