Жетісуда жыл басынан бері көлік құралдарын заңсыз қайта жабдықтау деректері тіркеліп жатыр. Соның ішінде зауытта қарастырылмаған LED шамдарды орнату жиілеген. Полиция мұндай әрекеттердің жол қауіпсіздігіне елеулі қауіп төндіретінін ескертеді, – деп хабарлайды Polisia.kz.
Жыл басынан бері Жетісу облысында полиция қызметкерлері көлік құралдарын тиісті рұқсатсыз қайта жабдықтауға байланысты 109 құқық бұзушылықты анықтады. Ең жиі кездесетін заң бұзушылықтардың бірі – зауытта қарастырылмаған LED шамдарды орнату.
Сырт көзге мұндай шамдар тиімді әрі заманауи көрінгенімен, олардың қауіпсіздікке кері әсері айтарлықтай. Жарықдиодты шамдар бастапқыда жарығы күштірек әрі жақсы көрінетіндей әсер қалдыруы мүмкін. Алайда зауыт талаптарына сәйкес келмейтін өзгерістер көліктің жарық жүйесінің дұрыс жұмыс істеуін бұзады.
Соның салдарынан қарсы бағытта келе жатқан жүргізушілердің көзі қарығып, жолдағы көріну деңгейі төмендейді. Әсіресе түнгі уақытта бұл жол-көлік оқиғаларының қаупін арттырады.
Айта кету керек, автокөлік өндірушілері жарық жүйесін әзірлеу барысында фаралардың бұрышы, жарықтың қарқындылығы мен таралуы сияқты көптеген факторды ескереді. Ал орынсыз орнатылған LED шамдар жарықтың ретсіз шашырауына әкеліп, қауіпті жағдай туғызады.
Полиция өкілдерінің айтуынша, зауытта қарастырылмаған LED шамдар – жол қауіпсіздігіне төнетін нақты қауіп. Әрбір бөлшек міндетті түрде арнайы тексерістен және сертификаттаудан өтеді. Сондықтан өз бетінше енгізілген өзгерістердің салдары ауыр болуы мүмкін.
Құқық қорғау органдары мұндай заң бұзушылықтар тек апатты жағдайларға әкеліп қана қоймай, қолданыстағы заң талаптарын бұзу екенін ескертеді. Ережелерді елемейтін жүргізушілер өз өмірін ғана емес, өзгенің де қауіпсіздігін қатерге тігеді.
Жетісу облысында рейдтік іс-шаралар алдағы уақытта да жалғасады. Негізгі мақсат – көлік құралдарын заңсыз қайта жабдықтаудың алдын алу және жол қозғалысының барлық қатысушылары үшін қауіпсіз орта қалыптастыру.
Жолдағы қауіпсіздік – әрбір жүргізушінің жауапкершілігінен басталады. Кейде болмашы көрінген өзгерістің өзі ауыр салдарға әкелуі мүмкін.
