Астана қаласының полиция департаменті оқу жылының аяқталуына орай өтетін "Соңғы қоңырау" және мектеп бітіру кештері кезеңінде кәмелетке толмағандардың заңды өкілдеріне балалардың қауіпсіздігін қамтамасыз ету және олардың жүріс-тұрысына бақылауды күшейту қажеттігін еске салады, - деп хабарлайды Polisia.kz.
Кейбір жағдайларда түлектер мерекелік көңіл-күйді ерекше атап өту мақсатында шуылы көп іс-шаралар ұйымдастырып, жол қозғалысы ережелерін бұза отырып автокортеждер өткізетіні байқалады. Мұндай әрекеттер қоғамдық тәртіптің бұзылуына, жол-көлік оқиғаларының туындауына және өзге де құқыққа қайшы салдарға әкелуі мүмкін.
Полиция кәмелетке толмағандардың қауіпсіздігі мен тәртібі үшін жауапкершілік олардың заңды өкілдеріне жүктелетінін ескертеді.
Осыған байланысты ата-аналарға:
- балаларының қай жерде жүргенін тұрақты бақылауда ұстау;
- кәмелетке толмағандардың түнгі уақытта ересектердің қарауынсыз ойын-сауық орындарында және үйден тыс жерде жүруіне жол бермеу;
- балалармен қауіпсіздік ережелері мен қоғамдық тәртіп талаптарын сақтау жөнінде түсіндіру жұмыстарын жүргізу;
- алкоголь өнімдерін тұтыну, жолдағы қауіпті әрекеттер және тәуекелді ойын-сауықтарға қатысудың салдары туралы алдын ала ескерту жасау ұсынылады.
Полиция азаматтарды қоғамдық тәртіпті сақтауға, қала тұрғындарының тыныштығына құрметпен қарауға және ауыр салдарға әкелуі мүмкін құқық бұзушылықтарға жол бермеуге шақырады.
