Павлодар қаласы пробация қызметінде пробациялық есепте тұрған адамдарға арналған үш айлық кәсіби оқыту курсы аяқталды, - деп хабарлайды Polisia.kz.
Кәсіби оқыту "Профресурс" көпсалалы орталығының базасында "Антарес-К" қоғамдық қорымен бірлесіп ұйымдастырылды. Бағдарламаның негізгі мақсаты – пробация есебіндегі азаматтардың әлеуметтік бейімделуіне ықпал ету, сұранысқа ие кәсіптік дағдыларды меңгерту және оларды одан әрі жұмыспен қамтуға мүмкіндік жасау.
Оқу барысында қатысушылар еңбек нарығында сұранысқа ие 15 жұмысшы мамандығын меңгерді. Олардың қатарында электрмонтер, жүк тиегіш машинасының жүргізушісі, аспаз, тракторшы-машинист, тепловоз машинисінің көмекшісі, автослесарь, дәнекерлеуші және басқа да мамандықтар бар.
Үш ай бойы тыңдаушылар таңдаған мамандықтары бойынша қажетті теориялық білім алып, практикалық дағдыларды меңгерді.
– Мамандық алу – бұл жаңа білім мен дағдыларды меңгеру ғана емес. Пробациялық есепте тұрған азаматтар үшін бұл өз өмірін өзгертуге, тұрақты жұмысқа орналасуға және өзін әрі отбасын қамтамасыз етуге берілетін нақты мүмкіндік. Біздің міндетіміз – тек бақылау жүргізу ғана емес, сонымен қатар олардың табысты әлеуметтенуіне қажетті жағдай жасау. Бірлескен жұмысымызға және пробация есебіндегі азаматтарды кәсіби даярлауға қосқан үлесі үшін "Профресурс" көпсалалы орталығына және "Антарес-К" қоғамдық қорына алғыс білдіреміз, – деді Павлодар қаласы пробация қызметінің міндетін атқарушы бастығы Тимур Шотаев.
Алынған біліктілік түлектердің жұмысқа орналасу мүмкіндігін арттырып, олардың дербес әрі заңға бағынатын өмірге қадам басуына жол ашады.
Пробация қызметі үшін кәсіби даярлау – азаматтарды қайта әлеуметтендіру процесінің маңызды бағыттарының бірі. Сұранысқа ие мамандықты меңгеріп, жұмысқа орналасу және тұрақты табыс табу мүмкіндігі адамның әлеуметтік байланыстарын қалпына келтіріп, қоғамға қайта бейімделуіне ықпал етеді.
Үш айлық оқу курсы қатысушылар үшін жай ғана білім алу емес, мамандық, жаңа дағдылар және болашаққа деген мүмкіндік қалыптастырған өмірдің жаңа кезеңіне жасалған маңызды қадам болды.
