Шымкент қаласының Полиция департаментінде ағымдағы жылдың тоғыз айындағы тәртіп пен заңдылықтың жай-күйі мен алдағы кезеңге арналған міндеттер бойынша кеңес өтті, – деп хабарлайды Polisia.kz.
Кеңес барысында департамент бастығының орынбасарлары мен Жергілікті полиция қызметі басқармасы бастығының баяндамалары тыңдалып, өзекті мәселелер талқыланды.
2020 жылдың тоғыз айында Шымкент қаласы Полиция департаментінің қызметкерлерімен құқық бұзушылықтардың алдын алу, қоғамдық қауіпсіздікті қамтамасыз етуге бағытталған бірқатар жұмыстар атқарылды.
Есептік мерзімде қала аумағында жалпы тіркелген қылмыс өткен жылмен салыстырғанда 26,2 пайызға төмендеген.
Сонымен қатар, жиында ҚР Президенті Қасым-Жомарт Тоқаев пен Ішкі істер министрі Ерлан Тұрғымбаевтың ағымдағы жылдың 29 қазанында ІІМ алқасының отырысында берілген тапсырмалары жеке құрамға жеткізілді.
– Мемлекет басшысы полиция қызметкерлерінің азаматтармен өзара қарым-қатынасының сервистік моделін енгізудегі басты қағида «қолжетімді полиция» болуы тиіс екендігін атап өтті. Осы қағиданы жүзеге асыру мақсатында учаскелік полиция инспекторлары тұрғындармен кері байланысты одан әрі нығайта түсуі қажет, – атап өтті департамент бастығы Ералы Жумаханбетов.
