Атырау облысында ауыл тұрғынынан тіркелмеген мылтық алынды, – деп хабарлайды Polisia.kz.
«Құқықтық тәртіп» республикалық жедел-профилактикалық іс-шарасы барысында полиция қызметкерлері Қызылқоға ауданы Жангелдин ауылдық округіне қарасты Кіндіксай елдімекенінің маңындағы далалықта «УАЗ» маркалы автокөлікті тоқтатқан.
Тексеру барысында көлік салонынан тіркелмеген тегіс ұңғылы аңшы мылтығы, 10 дана оқ-дәрі, қосымша жарық беру құрылғысы және атылған үш дала қояны табылды.
Көлік тізгінінде болған Миялы селосының тұрғынына қатысты ҚР Әкімшілік құқық бұзушылық туралы кодексінің 482-бабының 1-бөлігімен (Жеке және заңды тұлғалардың қаруды заңсыз иеленіп алуы, беруі, өткізуі, сақтауы, алып жүруі, тасымалдауы) жинақталған материалдар сотқа жолданды.
