Жаңа оқу жылының қарсаңында Абай облысы бойынша қылмыстық-атқару жүйесі департаментінің және барынша қауіпсіз мекеме қызметкерлері Абай облысы білім басқармасының "Ерекше білім беру қажеттіліктері бар балаларды қолдау орталығына" барды, - деп хабарлайды Polisia.kz.
Орталықта ерекше білім беру және әлеуметтік қолдауды қажет ететін 6-18 жас аралығындағы 40-тан астам бала тәрбиеленуде. Кездесу барысында ҚАЖ қызметкерлері балаларды жаңа оқу жылының басталуымен құттықтап, оларға оқуда табыс, жаңа білім, көтеріңкі көңіл-күй және армандарының орындалуын тіледі.
Балаларға ерекше сыйлық ретінде барынша қауіпсіз мекемеде жазасын өтеп жатқан адамдардың өз қолдарымен жасаған кітап қойғыштары табысталды. Әрбір бұйым ұқыптылықпен және ерекше ықыласпен жасалып, түрлі-түсті, көңілді суреттермен безендірілген. Бұл сыйлық балаларға қажетті оқу құралы ғана емес, сонымен қатар игі істердің адамдарды біріктіріп, мұқтаж жандарға қуаныш сыйлай алатынын көрсететін жақсы бастаманың символына айналды.
Орталық тәрбиеленушілері қонақтарды қуана қарсы алды. Кездесу барысында балалар өздерінің қызығушылықтары, армандары мен болашаққа жоспарлары туралы айтып, тілектерін білдіріп, ҚАЖ қызметкерлеріне сұрақтарын қойды.
Балалардың көпшілігі болашақта өз өмірін құқық қорғау саласымен байланыстырып, құқық қорғау органдарының қызметкері болуды армандайтыны да қуантты.
- Біздің балаларымыз үшін назар аудару, қолдау көрсету және шынайы адами қарым-қатынас өте маңызды. Мұндай кездесулер тәрбиеленушілерге өздеріне деген қамқорлықты сезінуге және қоғам үшін маңызды екенін түсінуге мүмкіндік береді. Абай облысы бойынша ҚАЖ қызметкерлеріне көрсеткен ықыластары мен өз қолдарымен жасаған тамаша сыйлықтары үшін шын жүректен алғыс айтамыз. Осындай бастамалар балалардың бойында мейірімділік, құрмет және жақсы іс жасауға деген ұмтылысты қалыптастырады деп сенемін, — деді орталық директоры Бахытгүл Айтимова.
— Мұндай кездесулер балалар үшін де, біздің қызметкерлеріміз үшін де үлкен маңызға ие. Біз балаларды жаңа оқу жылының басталуымен құттықтап қана қоймай, оларға жағымды эмоциялар, көңіл бөлу және жылулық сыйлағымыз келді. Кітап қойғыштар жазасын өтеп жатқан адамдардың қолынан жасалды. Олардың әрқайсысы бұл еңбектің балаларға қуаныш сыйлайтынын түсіне отырып әзірленді. Сыйлықтар балалардың оқуына пайдасын тигізіп, бүгінгі кездесудің жылы естелігі болып қалады деп үміттенеміз. Жаңа оқу жылы — жаңа кезеңнің, жаңа мүмкіндіктер мен жаңалықтардың бастауы. Әрбір бала оны көтеріңкі көңіл-күймен, өзіне деген сеніммен және айналасындағы адамдардың қолдауын сезіне отырып бастауы аса маңызды, — деп атап өтті Абай облысы бойынша ҚАЖ департаментінің кадр қызметі жөніндегі бөлімінің бастығы Райгүл Сауғабаева.
