Абай облысында түнгі уақытта жүрген 2174 жасөспірім анықталды, - деп хабарлайды Polisia.kz.
Абай облысында кәмелетке толмағандардың қауіпсіздігін қамтамасыз етуге бағытталған профилактикалық жұмыстар жүйелі түрде жалғасуда. Жыл басынан бері облыс полицейлері заңды өкілдерінің еріп жүруінсіз түнгі уақытта ойын-сауық орындарында және тұрғынжайдан тыс жүрген 2174 жасөспірімді анықтады. Тәртіп сақшылары ата-аналармен және заңды өкілдермен түсіндіру жұмыстарын жүргізіп, түнгі уақытта баланың қараусыз жүруі оның өмірі мен қауіпсіздігіне елеулі қатер төндіретінін ескертті.
Сонымен қатар 236 жасөспірім кәмелетке толмағандарды бейімдеу орталығына орналастырылды.
Түнгі мезгілде облыс аумағында полиция патрульдерінің бақылауы күшейтіледі. Тәртіп сақшылары үшін әрбір жасөспірімнің қауіпсіздігі – басты басымдықтардың бірі. Рейдтік іс-шаралар барысында ойын-сауық орындары, компьютерлік клубтар, саябақтар мен адам көп шоғырланатын аумақтар тұрақты түрде тексеріліп, жасөспірімдердің заң талаптарын сақтауына ерекше назар аударылуда.
Абай облысы полициясы профилактикалық жұмысты жазадан жоғары қояды. Негізгі мақсат – құқық бұзушылықтың салдарымен күресу емес, оның алдын алу. Осы бағытта ювеналды полиция қызметкерлері білім беру ұйымдарымен және ата-аналармен тығыз байланыс орнатып, жасөспірімдер арасындағы құқықтық сауаттылықты арттыруға басымдық беруде.
"Бала түнде көшеде емес, отбасының жанында болуы тиіс" – бұл полиция қызметкерлері ұстанатын негізгі қағидалардың бірі. Себебі бақылаусыз қалған жасөспірім түрлі құқық бұзушылықтың құрбанына айналуы мүмкін. Уақтылы жүргізілген профилактикалық шаралар көптеген келеңсіз жағдайлардың алдын алуға мүмкіндік береді.
Түнгі қала тыныш көрінгенімен, тәртіп сақшыларының жұмысы бір сәтке де тоқтамайды. Өйткені әрбір рейдтің артында бір баланың қауіпсіздігі, бір отбасының амандығы және қоғамның ертеңіне деген жауапкершілік жатыр.
