Алматы полициясында жаңа бөлімше құрылады, – деп хабарлайды Polisia.kz.
Президент Қасым-Жомарт Тоқаев өзінің Қазақстан халқына жыл сайынғы Жолдауында, полицияның басым бағыттарының бірі «Естуші мемлекет» тұжырымдамасы шеңберінде «қызметтік модельге» көшуін атап өтті, мұнда басты рөл учаскелік полиция инспекторына жүктеледі.
– Осы модельдің пилоттық жобасы бір жыл бұрын Қарағанды облысында басталды. Олардың мысалына сүйене отырып, қаланың екі ауданында осындай модельді пилоттық жоба ретінде енгізу жоспарлануда: Алатауда – жеке секторда және Бостандықта – тұрғын үй кешенінде. Елбасының тапсырмасы аясында біз Әкімдікпен бірге учаскелік полиция инспекторларының қызметін жетілдірудің үш жылдық жоспарын құрып жатырмыз. Бұл жоспар учаскелік полиция инспекторларының жұмысы мен тұрмыстық жағдайларының барлық аспектілерін қамтиды. Жоспардың артықшылықтарының бірі – учаскелік полиция инспекторлары өздерінің қызмет көрсетілетін әкімшілік аймағында тұратын болады, бұл азаматтардың өтініштеріне жедел жауап беруге мүмкіндік береді, – деді Алматы Полиция департаментінің бастығы Қанат Таймерденов қала тұрғындарының алдында есеп беру кезіндегі сөйлеген сөзінде.
2020 жылы барлық аға учаскелік инспекторлар халық арасында сенімділікті, қол жетімділікті және танымалдылықты арттыру мақсатында, «полиция жақын маңда» қағидатын жүзеге асыру мақсатында «Facebook» әлеуметтік желісіне тіркелді. Қазіргі уақытта 365 мыңнан астам азамат жазылған. Олар сондай-ақ, «WhatsApp» мессенджерінің ПИК чаттарына енгізілген, мұнда әкімшілік аймақтағы тұрғындардан әртүрлі проблемалық сұрақтар түседі, бұл ПИК-пен тығыз қарым-қатынас орнатуға және сұраныстарға тез жауап беруге мүмкіндік береді.
– Жоғарыда аталған шаралардан басқа, ішкі істер органдарын жаңарту мақсатында 2021 жылы Полиция департаменті келесі басым міндеттерді белгіледі, олардың орындалуы жедел ортаны жақсартуға және құқық бұзушылықтың алдын алуға мүмкіндік береді. Біріншіден, «Естуші мемлекет» қағидатын жүзеге асыру аясында Департаментте азаматтардың өтініштерін жедел қарау үшін арнайы бөлім құрылады. Екіншіден, үш деңгейлі сот төрелігі жүйесін енгізу үшін біз қылмыстық істердің 60%-ын тергеудің электрондық форматына өткіземіз. Үшіншіден, биыл жаңа формаға көшу жүзеге асырылады. Бірінші кезекте, өзгеріс сыртқы қызметтерге әсер етеді. Төртіншіден, біз қылмыстың алдын алу, қылмыстың өсуіне жол бермеу жұмыстарын жалғастырамыз. Осы мақсаттар үшін қылмыстық қауіпті аймақтардағы жаяу патрульдік жасақтар мен модульдік посттардың санын көбейтуді жоспарлап отырмыз, – деді Қанат Таймерденов.
