Ақтөбе облысы бойынша қылмыстық-атқару жүйесі департаментінде жылдың алғашқы алты айындағы қызмет қорытындыларына арналған жедел кеңес өтті, - деп хабарлайды Polisia.kz.
Жиынға департамент басшылығы, құрылымдық бөлімшелер мен бағынысты мекемелердің басшылары, қылмыстық-атқару жүйесінің ардагері, сондай-ақ Қазақстан Республикасы Ішкі істер министрлігі Ұлттық ұланының 6655 әскери бөлімінің өкілі қатысты.
Кеңес барысында жедел-қызметтік жұмыстың нәтижелері жан-жақты сараланып, сотталғандарды ұстау режимін сақтау, мекемелердегі қауіпсіздікті қамтамасыз ету, қызметтік тәртіп пен заңдылықты нығайту, сондай-ақ тәрбиелік және профилактикалық жұмысты жетілдіру мәселелері талқыланды.
Сонымен қатар қойылған міндеттердің орындалу барысына, бөлімшелер қызметінің тиімділігін арттыруға және қызметтік міндеттердің сапалы орындалуына ерекше назар аударылды. Әрбір бағыт бойынша нақты тапсырмалар беріліп, 2026 жылдың екінші жартыжылдығына арналған басым міндеттер айқындалды.
Жиын соңында қылмыстық-атқару жүйесінің ардагерлері көпжылдық қызметтік тәжірибелерімен бөлісіп, ұрпақтар сабақтастығын сақтаудың, қызметтік дәстүрлерді жалғастырудың және әрбір қызметкердің заң талаптары мен қызметтік тәртіпті қатаң сақтауының маңыздылығына тоқталды.
Кеңеске қатысушылар өзара үйлесімді іс-қимыл мен бірлескен жұмыстың өңірдегі қылмыстық-атқару жүйесі қызметінің тиімділігін одан әрі арттырудың басты кепілі екенін атап өтті.
