Екібастұз қаласында полиция қызметкерлері қызметтік борышын өтеу кезінде ерлікпен қаза тапқан әріптестері — Николай Бузинді еске алды. Дәстүрлі түрде марқұмдарды құрметтеуге арналған бұл күн оның ерлігі мен жанқиярлығын тағы бір мәрте еске түсіруге себеп болды, - деп хабарлайды Polisia.kz.
Құқық қорғау органдарының қызметкерлері бұрынғы учаскелік инспектор жерленген зиратқа барды. Әріптестерінің рухына тағзым етуге қала полиция басқармасының бастығы Төлеген Құдайбергенов те келді. Ол қызметтегі әріптестері және ардагерлермен бірге гүл шоқтарын қойып, қоғамдық тәртіпті қамтамасыз ету жолындағы еңбегін атап өтті.
Николай Бузин 1950 жылдың 5 қарашасында Рязань облысында дүниеге келген. Ішкі істер органдарындағы еңбек жолын 1976 жылы Екібастұз қалалық ішкі істер бөлімінде милиционер-радист ретінде бастаған. Екі жылдан кейін учаскелік инспектор болып тағайындалып, өзін жауапты әрі принципшіл қызметкер ретінде көрсетті.
1979 жылы Николай Бузин аса қауіпті қарулы қылмыскерді ұстау кезінде қаза тапты. Оның әрекеті шынайы ерлік пен антқа адалдықтың үлгісі болды. Көрсеткен батылдығы мен жанқиярлығы үшін ол "Қоғамдық тәртіпті қорғаудағы үздік қызметі үшін" медалімен (қайтыс болғаннан кейін) марапатталды. Оның есімі Екібастұз қалалық ішкі істер бөлімінің жеке құрам тізіміне мәңгілікке енгізілді.
Батырдың есімі қалада мәңгілікке қалдырылған: қалалық кеңестің шешімімен бұрынғы 2-ші Мектеп өткелі Николай Бузин көшесі болып қайта аталды.
Еске алу шарасы аясында полиция қызметкерлері зират аумағын абаттандыру жұмыстарын да жүргізді: қоршауды сырлап, аумақты тазалап, ретке келтірді. Бұл тек қызметтік міндет қана емес, әріптестерінің ерлігіне деген шынайы алғыс пен құрметтің белгісі болды.
Әріптестерінің айтуынша, Николай Бузиннің ерлігі ешқашан ұмытылмайды. Оның қызметі жас полицейлер үшін батылдықтың, ар-намыс пен антқа адалдықтың үлгісі болып қала береді.
