Мақтааралда жалған жүргізуші куәлігін жасатқан ер адам айыппұл төлейді, – деп хабарлайды Polisia.kz.
Мақтаарал АПБ-ға “Жетісай” шекаралық бақылау бөлімшесінің қызметкерлерінен хабарлама түскен. Онда ҚР азаматы DAF маркалы жүк көлігімен Өзбекстан Республикасынан елге кірген азаматтың құжатында бір кінәрат бар екендігі туралы көрсетілген. Хабарламаны алған Мақтаарал АПБ-ның полиция қызметкерлерінен тәжірибелі топ құрылып, бірден оқиға орнына келді. Осылайша ел аумағына кірмек болған адамның құжаттары мұқият тексерілді.
Нәтижесінде ер адамның жүргізуші куәлігінің жалған екенін анықтады. Тәртіп сақшылары аталған жайтты ҚР ҚК-нің 385-бабы (Жалған құжаттарды, мөртабандарды, мөрлердi, бланкілерді, мемлекеттiк пошта төлемі белгілерін, мемлекеттiк наградаларды қолдан жасау, дайындау немесе өткiзу) бойынша СДТТБТ-ға тіркеп, күдікке ілінген азаматты ПБ-ға жеткізді.
Белгілі болғандай, күдікті бұған дейін алты айға жүргізуші куәлігінен айырылған. Содан соң танысының жүк көлігін айдап, жүргізуші болып жұмыс істеу мақсатында жалған жүргізуші куәлігін жасатып алған. Полицейлер осы аталған жайтқа байланысты ҚР ҚК-нің 385-бабы бойынша іс-құжаттарды жинақтап, заңды шешім қабылдау мақсатында Мақтаарал аудандық сотына жолданды. Қазіргі таңда сот күдіктіні кінәлі деп танып, 29 170 теңге көлемінде айыппұлды өтеу туралы үкім шығарды.
