Павлодар облысында полицейлер оқушылармен профилактикалық кездесу өткізді, — деп хабарлайды Polisia.kz.
“Жасөспірімдерді бақылау” жедел-профилактикалық іс-шарасы аясында және “Заң мен тәртіп” тұжырымдамасын іске асыру мақсатында Павлодар облысы полиция департаментінің профилактикалық жұмысты үйлестіру басқармасының қызметкерлері Ахмет Байтұрсынұлы атындағы инновациялық үлгідегі орта мектептің оқушыларымен профилактикалық кездесу өткізді.
Іс-шараның басты мақсаты – жасөспірімдердің құқықтық сауаттылығын арттыру, құқық бұзушылықтардың алдын алу және заң талаптарын сақтауға жауапкершілікпен қарауды қалыптастыру.
Кездесу барысында полиция қызметкерлері оқушыларға қолданыстағы заңнама нормаларын түсіндіріп, кәмелетке толмағандардың әкімшілік және қылмыстық құқық бұзушылықтар жасағаны үшін жауапкершілігі туралы, сондай-ақ құқыққа қайшы әрекеттердің негізгі себептері мен салдары жөнінде айтып берді.
Буллинг пен кибербуллингтің алдын алуға, алкогольдік ішімдіктер мен есірткі заттарын тұтынудың жолын кесуге, әлеуметтік желілерде деструктивті контенттің таралуына жол бермеуге, сондай-ақ интернет кеңістігіндегі қауіпсіздік мәселелеріне ерекше назар аударылды.
“Заң мен тәртіп” тұжырымдамасының қағидаттарына да ерекше көңіл бөлінді. Оқушыларға заңды сақтау әр адамның күнделікті іс-әрекетінен басталатыны, ал айналасындағыларға құрметпен қарау, белгіленген ережелерді сақтау және жауапты мінез-құлық қауіпсіз қоғамның негізі екені түсіндірілді.
Оқушылар әңгімеге белсенді қатысып, өздерін қызықтырған сұрақтарын қойып, мектепте, көшеде және интернет желісінде қауіпсіз жүріс-тұрыс бойынша практикалық кеңестер алды.
Мұндай профилактикалық кездесулер өскелең ұрпақтың құқықтық мәдениетін қалыптастыруға, өз іс-әрекетіне саналы түрде қарауына және заң талаптарын сақтау кезіндегі жеке жауапкершілігін түсінуіне ықпал етеді.
