Павлодар облысында полицейлер зейнеткерлерді қарттар күнімен құттықтады, — деп хабарлайды Polisia.kz.
1 қазан – әртүрлі ұрпақты біріктіретін ерекше күн – Халықаралық қарттар күні. Бұл – аға буын өкілдеріне құрмет көрсетіп, алғыс білдіріп, көңіл бөлуге тағы бір себеп.
Павлодарда полицейлер үшін ардагерлер мен қарттарды осы мерекемен құттықтау игі дәстүрге айналып, аға буын өкілдеріне арнайы барып, жылы ықылас білдіруге мүмкіндік беріп келеді. Осы күні Павлодар облысы полиция департаментінің қызметкерлері Павлодар облысының қарттар мен мүгедектерге арналған интернат үйіне барып, оның тұрғындарын мерекемен құттықтап, көтеріңкі көңіл күй сыйлады.
Қонақтарға арнайы мерекелік бағдарлама дайындалды. Полиция қызметкерлері тұрғындарға таныс әрі сүйікті әндерін орындап, залда жылылық пен жайлылыққа толы ерекше көңіл күй қалыптастырды. Интернат тұрғындары өнер көрсеткен қызметкерлерді күлімдеп қарсы алып, таныс әуендерге қосылып, кездесуге шын жүректен қуанды.
Бұл күні алғыс сөздер, ізгі тілектер мен құттықтаулар айтылды. Аға буын өкілдері үшін көңіл бөлу мен шынайы қарым-қатынас аса маңызды. Сондықтан кездесу ерекше жылы әрі әсерлі өтті.
Полиция қызметкерлері интернат тұрғындарына зор денсаулық, бейбітшілік, амандық және жарқын күндердің көп болуын тіледі. Өз кезегінде олар да ақжарма алғыстары мен ізгі тілектерін жеткізді.
Мерекелік кездесу интернат тұрғындарына қуаныш пен көтеріңкі көңіл күй сыйласа, полиция қызметкерлері үшін аға буынға деген құрметін білдірудің тағы бір мүмкіндігі болды.
Бұл күні бастысы – тек құттықтау ғана емес, жандарында болып, әңгімелесу, бірге күлімдеу және адамға қажет жылулық пен көңіл бөлуді сыйлау еді.
