Павлодар қаласының патрульдік полиция батальонында "Кот учёный" балалар білім беру орталығының тәрбиеленушілері үшін ашық есік күні өтті, - деп хабарлайды Polisia.kz.
Балаларға экскурсияны патрульдік полиция батальоны командирінің орынбасары Нұрболат Алигожин өткізді. Ол қонақтарға бөлімшенің негізгі міндеттері мен қызмет ерекшеліктері туралы айтып, Жол қозғалысы қағидаларын сақтаудың маңыздылығын түсіндірді.
— Осындай кездесулер балаларға полиция қызметі туралы көбірек білуге ғана емес, сонымен қатар өз қауіпсіздігіне жауапкершілікпен қарауға үйретеді. Балалардың жастайынан Жол қозғалысы қағидаларының маңызын түсініп, оларды күнделікті өмірде сақтауы өте маңызды, — деді Алигожин.
Экскурсия барысында жас қонақтар патрульдік автокөліктермен танысып, полиция экипаждарының қандай құрал-жабдықтармен қамтамасыз етілгенін және жол қауіпсіздігін қалай қамтамасыз ететінін білді.
Іс-шараның ең әсерлі сәттерінің бірі кинологтың жетекшілігімен қызметтік иттің шеберлігін көрсету болды. Төртаяқты көмекші шартты түрде жасырылған тыйым салынған затты еш қиындықсыз тауып, өзінің кәсіби машығын көрсетті. Көрген көрініс балалардың ерекше қызығушылығын тудырып, олар иттің әрбір әрекетін мұқият бақылап, кинологтан оның дайындығы, жаттығулары мен қызметі туралы көптеген сұрақ қойды.
Кездесу соңында жас қатысушыларға көшеде және жолдың жүріс бөлігіне жақын жерде қауіпсіз жүріп-тұрудың негізгі ережелері тағы бір мәрте еске салынып, ұқыптылық пен тәртіптің қауіпті жағдайлардың алдын алуға көмектесетіні атап өтілді.
Танымдық экскурсия жылы әрі достық атмосферада өтіп, павлодарлық жасөспірімдерге жарқын әсер сыйлап, полиция мамандығымен жақынырақ танысуға мүмкіндік берді.
