Қазақстан полициясы күні – жай ғана кәсіби мереке емес. Бұл – күн сайын Заң мен тәртіпті сақтап, азаматтардың қауіпсіздігін қамтамасыз етіп, қиын сәтте көмекке алғаш болып келетін жандарға көрсетілетін құрмет күні. 23 маусымда Жетісу облысында полиция қызметкерлерін, ішкі істер органдарының ардагерлерін, мемлекеттік органдар өкілдері мен қоғам қайраткерлерін біріктірген салтанатты іс-шаралар өтті, – деп хабарлайды Polisia.kz.
Негізгі мерекелік жиын Ілияс Жансүгіров атындағы Мәдениет сарайында ұйымдастырылды. Мұнда полицияның әртүрлі бөлімшелерінің қызметкерлері, ардагерлер, мемлекеттік органдардың басшылары мен құрметті қонақтар бас қосты. Тәртіп сақшыларының атына шынайы құттықтаулар мен олардың жауапты әрі маңызды еңбегіне деген алғыс сөздер айтылды.
Полиция қызметкерлерін кәсіби мерекемен Жетісу облысының әкімі Бейбіт Исабаев құттықтады. Өз сөзінде өңір басшысы қоғамдық тәртіпті қамтамасыз ету, азаматтардың құқықтарын қорғау және аймақтың қауіпсіздігін нығайту жолындағы ішкі істер органдарының маңызды рөлін атап өтті. Ол полиция қызметкерлеріне антқа адалдығы, жауапкершілігі мен жанқиярлық еңбегі үшін ризашылығын білдіріп, зор денсаулық, отбасыларына амандық және қызметтеріне толағай табыс тіледі.
Салтанатты жиында қызметтік міндеттерін үлгілі атқарып, жоғары нәтижелерге қол жеткізген қызметкерлерге ерекше құрмет көрсетілді. Кәсібилігі, адал еңбегі және қоғамдық қауіпсіздікті қамтамасыз етуге қосқан үлесі үшін бірқатар полицей ведомстволық наградалармен, Құрмет грамоталарымен және Алғыс хаттармен марапатталды.
Ішкі істер органдарының ардагерлері де ізгі тілектерін білдіріп, ұрпақтар сабақтастығын сақтаудың маңызына тоқталды. Олар адалдық, әділдік, жауапкершілік пен парызға беріктік әрқашан полиция қызметкерінің басты қасиеттері болып қала беретінін атап өтті.
Мерекенің тағы бір ерекшелігі – ардагерлер мен жас қызметкерлердің бір ортада бас қосуы болды. Бірі өмірлік тәжірибесімен бөліссе, енді бірі күнделікті еңбегімен полиция қызметінің даңқты дәстүрлерін жалғастырып, абырой, ерлік пен заңға адалдықтың мәңгілік құндылық екенін тағы бір мәрте дәлелдеді.
Іс-шара мерекелік концертпен қорытындыланды. Өнерпаздар мен полиция қызметкерлері ұсынған музыкалық бағдарламалар жиналған қауымға көтеріңкі көңіл-күй сыйлап, қоғам тыныштығы мен азаматтар қауіпсіздігі жолында еңбек етіп жүрген жандарға деген құрмет пен мақтаныш сезімін арттыра түсті.
