Қызылорда облысында пробация есебіне алынған сотталған азамат түзеу мекемесінің қабырғасында тігін тігу кәсібін меңгеріп, бостандыққа шыққаннан кейін өз кәсібін дөңгелетіп отыр, – деп хабарлайды Polisia.kz.
Қазіргі уақытта бас бостандығынан айыру орындарынан босатылғандардың басым көпшілігі жеке кәсіпкерлікке қызығушылық танытуда және олар пробация қызметінің есебінде тұрып, азаматтарға көрсетілетін әлеуметтік-құқықтық көмекті алу мүмкіндігін белсенді пайдалануда.
Қазір олардың көпшілігі мал шаруашылығымен айналысады, кейбірі бетон өнімдерін шығарса, бірі шаштараз, компьютер жөндеу орталықтарын ашып жатыр. Біздің бүгінгі кейіпкеріміз – тігін ісінің шебері. Ол осы өнердің қыр-сырын қайда және қалай игергені туралы айтып берді.
Сотталған азамат 20 жасында кісі өлтіргені үшін 13 жылға бостандығынан айырылған. Қызылорда қаласындағы түзеу мекемесінде жазасын өтеп жүрген кезінде мекемеде кәсіби білім алып, тігін шебері мамандығын игерген.
– Мен мектепте жақсы оқыдым деп айта алмаймын. Мінезім жастайымнан ауыр болды. Жоғары білім ала алмадым. Түзеу колониясына келгеннен кейін мен бұл мүмкіндікті жіберіп алмау үшін бар күшімді салдым. Тігінші мамандығын таңдадым, маталардың түрлерін ажырата білуді үйрендім, өрнектерді боядым, фигураға сәйкес бұйымдарды бейімдедім. Диплом алғаннан кейін мекеме қызметкерлері мені қылмыстық-атқару жүйесі мекемесінің өндірістік аймағындағы тігін цехына жұмысқа орналастырды. Мен кез-келген тігін машинасын жөндеуді, матамен жұмыс істеу кезінде инелер мен жіптерді таңдауды, тігісті түзетуді үйрендім. Мен 2012 жылы колонияға түскен сәттен бастап өз ісімді таптым деп айта аламын, – деді сотталған азамат.
“Еңбек-Қызылорда” РМК тігін цехы 2015 жылдан бастап ЗК-169/5 мекемесінің өндірістік базасында жұмыс істейді. Қазіргі уақытта мұнда 20 сотталған еңбекпен қамтылған, олардың кейбіреулері мақала кейіпкері сияқты тігіншілікті игерген. Біз сотталғандардың мінез – құлқы мен санасын түзетуге ықпал ететін барлық бастамаларда қолдауға тырысамыз, – дейді Қызылорда облысы бойынша ҚАЖД ЗК-169/5 мекемесінің бастығы Тасболат Қалымбетов.
2019 жылы Қызылорда қаласы №2 сотының қаулысымен ҚР Қылмыстық кодексінің 73-бабына сәйкес аталған азаматтың жазасының өтелмеген бөлігі бас бостандығын шектеу жазасына ауыстырылып, ол түзеу мекемесінен босатылып, пробация қызметіне есепке тұрған.
– Менің арманым-колониядан шығып, өз ісімді ашу болған еді. Осы арманымды іске асыру үшін қалалық пробация қызметкерлері әлеуметтік-құқықтық көмек көрсетті және өтеусіз қаражат алуға көмектесті, – дейді ол.
