Жетісу облысында ЖБО қызметкерлері тәулік бойы, аптасына жеті күн жедел жағдайды және қоғамдық тәртіпті бақылап, патрульдік экипаждар мен полицияның басқа да бөлімшелерінің жұмысын үйлестіреді, - деп хабарлайды Polisia.kz.
Қиын жағдайға тап болдыңыз ба? Күдікті әрекетті байқадыңыз ба? Мүлкіңіз ұрланды ма? Бала жоғалды ма? Жол-көлік оқиғасына тап болдыңыз ба? Мұндай жағдайлар — Жетісу облысы полиция департаментінің жедел басқару орталығы (ЖБО) қызметкерлері күн сайын қабылдайтын өтініштердің бір бөлігі ғана.
Дәл осы қызметкерлер "102" арнасына келіп түсетін қоңырауларды, сондай-ақ eGov платформасындағы "Заң мен Тәртіп" қосымшасы арқылы азаматтардың өтініштерін алғашқылардың бірі болып қабылдайды. Сіз оларды көрмеуіңіз мүмкін. Алайда сіздің хабарламаңызды қабылдап, жағдайды бағалап, жедел әрекет ету тетігін іске қосатын — солар.
Әрбір қоңыраудың артында жедел әрі жауапты жұмыс тұр. Қызметкерлер қысқа уақыт ішінде оқиғаның мән-жайын анықтап, қауіп деңгейін бағалап, оқиға орнына ең жақын полиция нарядын бағыттауы қажет.
ЖБО қызметкерлері тәулік бойы, аптасына жеті күн бойы жедел жағдай мен қоғамдық тәртіпті бақылап, патрульдік экипаждар мен полицияның басқа да бөлімшелерінің жұмысын үйлестіреді.
Сіз оларды көрмейсіз. Есімдерін де білмеуіңіз мүмкін. Бірақ дәл қажет сәтте олар сіздің дауысыңызды естіп, хабарламаңызды қабылдап, көмек көрсетудің алғашқы қадамын жасайды.
ЖБО қызметкерінің бір күні — әрбір қоңырауды мұқият тыңдап, жағдайды жедел бағалап, қажетті көмекті уақытылы ұйымдастыруға әрдайым дайын болу. Тәулігіне 24 сағат, аптасына 7 күн — азаматтардың қауіпсіздігі үшін.
