Талдықорған қаласында қоғамдық тәртіп пен азаматтардың қауіпсіздігін қамтамасыз ету мақсатында ауқымды рейдтік іс-шара өткізілді. Мұндай шаралар құқық бұзушылықтарды тіркеумен ғана шектелмей, олардың алдын алудың тиімді тетігі ретінде маңызды рөл атқарады, - деп хабарлайды Polisia.kz.
Рейд барысында полиция қызметкерлері бір түн ішінде 127 құқық бұзушылықты анықтап, жолын кесті. Атап айтқанда қоғамдық орындарда алкогольдік ішімдік ішу, мас күйінде жүру, азаматтарға тиісу, түнгі тыныштықты бұзу, сондай-ақ кәмелетке толмағандардың заңды өкілдерінің еріп жүруінсіз түнгі уақытта көшеде болуы деректері тіркелді.
Жол қозғалысы қауіпсіздігі де назардан тыс қалған жоқ. Тексеру барысында техникалық талаптарға сай келмейтін көлік құралдарын басқару, жол жүру ережелерін бұзу, құжатсыз және мас күйінде көлік жүргізу фактілері анықталды. Сонымен қатар жаяу жүргіншілер тарапынан да құқық бұзушылықтар тіркелді.
Бұдан бөлек, ішкі істер органдарында есепте тұрған 35 азамат тұрғылықты мекенжайлары бойынша тексеріліп, 7 адам уақытша бейімдеу орталығына жеткізілді.
Айта кету керек, әрбір анықталған құқық бұзушылық — жай ғана статистика емес, алдын алынған ықтимал қауіп. Полицияның дер кезінде араласуы құқық бұзушылықтардың ауыр қылмыстарға ұласуына жол бермей, азаматтардың өмірі мен денсаулығын қорғауға мүмкіндік береді.
- Полицияның басты міндеті — тек құқық бұзушылықтарға әрекет ету ғана емес, олардың алдын алу. Әрбір жолы кесілген құқық бұзушылық — болашақтағы тәуекелдің азаюы. Осы түнде біз ауыр салдарға әкелуі мүмкін жағдайлардың алдын алдық, — деп атап өтті полиция өкілдері.
Осындай рейдтік іс-шараларды жүйелі түрде өткізу қаладағы жедел ахуалды тұрақты сақтауға және азаматтар арасында заң талаптарын сақтау мәдениетін қалыптастыруға ықпал етеді.
