Түркістан облысы полицейлері үй ішінде есірткі егумен айналысқан тұрғынды анықтады, – деп хабарлайды Polisia.kz.
Шардара аудандық полиция бөлімшесіне жергілікті тұрғыннан өзіне жақын таныс емес азаматтың заңсыз есірткі егумен айналысатыны жөнінде хабарлама түседі. “Қарасора-2020” жедел-профилактикалық іс-шарасы барысында аудандық полицейлер келіп түскен ақпаратты анықтап, тексеру үшін көрсетілген мекен-жайға шұғыл жетеді.
Тәртіп сақшылары тұрғынның үйін тінту кезінде оның үйі мен сарайының ішінен есірткі затына ұқсас өзіне тән хош иісі бар, өсіруге тыйым салынған, күтіп-бапталған өсімдіктер тапты. Күдікке ілінген ер адам бұрын сотты болған Шардара ауданының тұрғыны болып шықты. Нақтырақ айтсақ, тұрғынның үйінен бес түп есірткі өсімдігіне ұқсас өсімдік тәркіленіп алынды. Сондай-ақ бөлмеден марихуанаға ұқсас кептірілмеген өсімдік алынды. Оған қоса күдікті тұрғынның үйінен екі литрлі 24 дана шыны банкіде есірткі затына ұқсас заттар және үй ішінде өсірілетін өсімдіктерді күтіп-баптауға арналған үш дана құрылғылар алынды.
Сараптама тағайындалды. Осылайша, зерттеуге ұсынылған бес түп өсімдік “сора” болып шықты. Салмағы 1,6 келіден асады. Ал, бөлмеден алынған өсімдік салмағы 16 граммнан астам “кептірілген марихуана” болып шықты. Аталған жайт Сарыағаш аудандық полиция бөлімшесінің сотқа дейінгі тергеп-тексерудің бірыңғай тізіліміне ҚР Қылмыстық кодексінің 300-бабы (құрамында есірткі заттары бар өсіруге тыйым салынған өсімдіктерді заңсыз өсіру) бойынша тіркелді.Қазіргі уақытта полиция қызметкерлері істің толық мән-жайын анықтап, күдікті өз үйінде есірткіні қандай мақсатта өсіргенін анықтап жатыр. Тергеу амалдары жүргізіледі.
