Жамбыл облысында заңсыз балық аулаудың 156 дерегі тіркелді, – деп хабарлайды Polisia.kz.
Ағымдағы жылғы 15 сәуір мен 31 мамыр аралығында уылдырық шашу маусымына сәйкес, Жамбыл облысының аумағында “Уылдырық -2021” жедел-алдын алу іс-шарасы өтуде.
– Іс-шараның 27 күнінде жамбылдық полицейлер ағаштар мен бұталарды заңсыз кесу, жою немесе зақымдауға қатысты екі қылмыстық істі, балық ресурстарын заңсыз аулаудың 154 әкімшілік құқық бұзушылық дерегін анықтады. Оның ішінде – жер қойнауына мемлекеттік меншік құқығын бұзудың екі дерегі, жануарлар дүниесін пайдалану талаптары мен аң аулау қағидаларының бұзылуының – 35, балық аулау және балық ресурстары мен басқа да су жануарларын қорғау қағидаларының бұзылуының 119 дерегін анықтады. 106 адамға қатысты жалпы сомасы екі миллион теңгеге жуық әкімшілік айыппұл салынды, оның 800 000 теңгеден астамы өндірілді, – деп хабарлады Жамбыл облысының ПД ЖПҚБ бастығы Рахымберді Ашкеев.
“Уылдырық” жедел-алдын алу шарасы кезінде полицейлер құқық бұзушылардан 50 келіден астам балық, 550 метр синтетикалық моноталшық торлары, алты тыйым салынған заттар (қолдан жасалған балық ұстайтын шанышқы) және бір резеңке қайық тәркіледі.
