Түркістан облысының полицейлері қарт жүргізушіге дөңгелегін ауыстыруға көмектесті, – деп хабарлайды Polisia.kz.
Жетісай – Жібек жолы – Сарыағаш тас жолын патрульдеу кезінде Түркістан облысының патрульдік полиция батальонының қызметкерлері жол жиегінде тұрған Audi көлігін байқады. Содан тәртіп сақшылары жақындап, жүргізушінің не себепті тоқтап тұрғанын анықтады.
Қарт адам көліктің дөңгелегі жарылып, оны өз бетінше ауыстыруға күші жетпегенін айтты. Сонымен қатар ауа райының суық болуына байланысты жүргізушілердің ешқайсысы жол шетіндегі қарияға тоқтамаған. Жүргізушінің қиын жағдайға тап болғанынын білген тәртіп сақшылары оған бірден көмек көрсетті. Құрал саймандардың көмегімен полиция көліктің дөңгелегін ауыстырып, әрі қарай жолын жалғастыруға септігін тигізді.
Автокөлік жүргізушісі полицейлерге көрсеткен қамқорлығы мен көмегі үшін үлкен алғысын білдірді.
– Көліктің дөңгелегі жарылды. Мен жолда қалып қойдым. Дөңгелекті ауыстырайын десем, кептеліп қалған. Маған көмек көрсеткен полицейлерге рақмет. Оларға жұмыста сәттілік тілеймін, – деді жүргізуші.
Полицейлердің айтуынша, кезекшілік кезінде жолдарда мұндай жағдайлар жиі кездеседі және олар әрқашан көмекке келуге дайын. Тәртіп сақшылары атап өткендей, олар үшін ең бастысы – жүргізушілер мен жолаушылардың қауіпсіздігі.
