Таразда синтетикалық есірткі сатушы ұсталды, – деп хабарлайды Polisia.kz.
Жамбыл облысы ПД есірткі қылмысына қарсы іс-қимыл басқармасының қызметкерлері Тараз қаласында синтетикалық есірткінің ірі партиясын тәркіледі.
Оны заңсыз сақтау және тарату дерегі бойынша облыс орталығының 40 жастағы тұрғыны ұсталды.
Күдіктінің үйін тінту барысында облыс орталығының аумағында одан әрі өткізу үшін 60 орамға салып, дайындап қойған синтетикалық есірткі табылды. Сонымен қатар, есірткі затын қолдануға арналған құрылғы анықталды.
Күдікті Тараз қаласының уақытша ұстау изоляторына қамауға алынды.
– Қазіргі уақытта аталған дерекке қатысты ҚР ҚК-нің 297-бабы 3-бөлігімен (Есірткі, психотроптық заттарды, олардың аналогтарын аса ірі мөлшерде өткізу мақсатында заңсыз дайындау, қайта өңдеу, сатып алу, сақтау, тасымалдау, жөнелту немесе өткізу) бойынша сотқа дейінгі тергеп-тексеру амалдары басталды. Бұл бапқа сәйкес мүлкі тәркіленіп, он жылдан он бес жылға дейінгі мерзімге бас бостандығынан айыру түріндегі жазаны қарастырылған, – деп атап өтті Жамбыл облысы ПД есірткі қылмысына қарсы іс-қимыл басқармасының бастығы Әлім Бажықбаев.
