СҚО-да Қазақстан полициясының 30 жылдығына орай жаппай жүгіруден жарыс өткізілді, – деп хабарлайды Polisia.kz.
Петропавлдың мәдени және демалыс орталық саябағында облыстық аппарат пен қалалық полиция ведомствосы қызметкерлері арасында жаппай жүгіру өткізілді. Спорттық іс-шара қазақстандық полицияның 30 жылдығына арналды. Іс-шараны “Динамо” облыстық дене шынықтыру спорт қоғамының мамандары, сондай-ақ Полиция департаментінің Арнайы және жұмылдыру даярлығы басқармасы ұйымдастырды.
Жедел уәкілдер, криминалистер, патрульдік, айдауылдау, кинология қызметкерлері – мерекелік кросқа барлық жетекші қызметтердің қызметкерлері қатысты. Офицерлермен, сержанттармен бірге ішкі істер органдарының ардагерлері де жүгірді. Жалпы кросқа 70-тен астам погонды спортшылар қатысты. “Динамо” қоғамының облыстық филиалы төрағасының орынбасары Талғат Тұғұнбаев және СҚО ПД Ардагерлер кеңесінің төрағасы Ақан Сыздықовпен бірге СҚО ПД Есірткі қылмысына қарсы іс-қимыл басқармасы бастығының орынбасары полиция подполковнигі Иван Терзиди де жарысқа қатысушыларға сәттілік тіледі. Ол нашақорлыққа қарсы күрес бойынша республикалық айлық өтіп жатқандығына тоқтала кетіп, жарысқа қатысушылардың салауатты өмір салтын насихаттауы – жерлестерімізге, әсіресе жастарға жақсы үлгі екендігін атап өтті.
30 жастан асқан ерлер арасында 2 шақырым қашықтықта Полиция департаментінің қызметкері Данияр Қажымұратов мәреге бірінші болып жетті. Екінші орында Александр Хәкімов. Үшінші орынды айдауылдау взводының қызметкері Шоқан Адрақов иеленді. 30 жасқа дейінгі 3 шақырым қашықтыққа жүгіруде Дмитрий Шварц жеңімпаз атанды. Екінші орынды Нариман Ташимов иеленді. Петропавл қ. Полиция басқармасының қызметкері Жақсылық Сейтақов үздік нәтижемен мәреге үшінші болып келді. Қыздар арасында Полиция департаментінің қызметкері Татьяна Долбышева чемпион атанды. Екінші орынды Дарина Білденова және үшінші орынды аға жедел уәкіл Зарина Попова иеленді. Ішкі істер органдарының ардагерлері арасында Анатолий Слипецкий мәреге бірінші болып жетсе, екінші орынға Нұржан Күдеров тұрақтады, ал жүлдегерлер үштігін Атымтай Аманжолов тұйықтады.
Жарыс жеңімпаздары “Динамо” логотипі бар спорттық футболкалармен марапатталды, жүлдегерлерге грамоталар табысталды. Полицейлер арасындағы жүгіруден жарыс облыстың барлық аудандарында да өткізілуде.
