Алматы полицейлері балалар үйінің тәрбиеленушілерін Жаңа жылмен құттықтады. Бұндай шешімді Алматы қалалық ПД Арнайы және жұмылдыру дайындығы басқармасының қызметкерлері бірауыздан қабылдады, – деп хабарлайды Polisia.kz.
Полиция қызметкерлері облыстық №1 балалар үйіне жәшік сыйлықтармен және көтеріңкі көңіл-күймен келді. Үлкен залға сәбиден жасөспірімге дейін жиналды. Онда полицейлер конкурстар мен спорттық жарыстар өткізді.
Ойын-сауыққа барлық балалар қатысты, ал ерекше көзге түскен балалар сыйлықтармен қатар жарыстарда жеңімпаз атанғандары үшін жүлделермен марапатталды.
Балалар үйінің басшылығы өз кезегінде ата-ана мейіріміне, ілтипатына зәру бүлдіршіндерге мейірімділік танытқан тәртіп сақшыларына шынайы алғысын білдірді.
Тәртіп сақшылары мұндай науқандарды бірнеше жылдан бері өткізіп келеді, балалар қала полицейлерінің жаңа жылдық сыйлықтарын асыға күтеді.
