Супермаркеттен екі бөтелке брендтік вискиді қолды еткен астаналық анықталды, – деп хабарлайды Polisia.kz.
Елордалық дүкеннің қызметкерлері Сhivas regal брендті виски бөтелкелерінің жоғалғанын байқап, полицияға жүгінген. Келтірілген шығын шамамен 70 мың теңгеге бағаланды.
Бұл оқиға бойынша жедел-іздестіру іс-шараларын өткізу барысында Сарыарқа ауданы ПБ аудандық полиция бөлімінің қызметкерлері ұрлық жасауға қатысы бар 45 жастағы қала тұрғынын анықтады.
Күдіктінің әрекеті супермаркетте орнатылған бейнебақылау камераларының объективіне түсіп қалған. Кадрларда ер адамның алкогольдік сусындарды себетке салып жатқанын көруге болады. Әрі қарай ол алкогольдік сөреден шығып, вискиін басқа заттармен жауып қойған. Шығуға жақындаған ер адам себеттен бір пакет вискиді алып, дүкеннен байқатпай шығып кеткен. Қымбат вискиді жақсы көретін ер адам оны жалғыз өзі отырып ішіп қойғаны белгілі болды.
Астана қаласының полиция департаменті азаматтарды сақ болуға, жұмыс орнын қараусыз қалдырмауға ескертеді.
