Зайсан тұрғынынан газды тапанша тәркіленді, – деп хабарлайды Polisia.kz.
Шілде айының соңында полиция қызметкерлері жедел-іздестіру іс-шараларын жүргізу барысында Зайсан қаласының Спамбетов көшесінде 23 жастағы тұрғынды ұстаған. Оны жеке тінту барысында тапанша және оған арналған үш патрон тәркіленді.
Сараптаманың қорытындысына сәйкес, тәркіленген тапанша 1998 жылы шығарылған 8 мм калибрлі ИЖ—79-8 өзін-өзі қорғауға сондай-ақ, маркалы дыбыстық сигнал беруге арналған газды тапанша екендігі, атыс қаруы еместігі белгілі болды.
Ер адам тапаншаны Марқакөл ауылындағы автожолдың бойынан тауып алып, жеке пайдалану үшін қалдырғанын айтты.
Аталған дерекке қатысты ҚР ӘҚБтК-нің 482-бабы 1-бөлігі (Жеке және заңды тұлғалардың қаруды заңсыз алу, беру, өткізу, сақтау, алып жүру, тасымалдау) бойынша әкімшілік хаттама толтырылды.
Осы бап оның негізгі құрамдас бөліктерін тәркілей отырып, 20 АЕК мөлшерінде айыппұл төлеуге әкеп соғады.
Тәртіп сақшылары азаматтарға қару мен оқ-дәрілерді заңсыз сақтағаны үшін әкімшілік және қылмыстық жауапкершілік қарастырылғанын тағы да еске салады. Заңсыз сақталған қаруды, оқ-дәрілерді және жарылғыш заттарды өз еркімен тапсырған адамдар, егер олардың әрекеттерінде басқа қылмыс құрамы болмаса, қылмыстық және әкімшілік жауапкершіліктен босатылады.
