Астана қаласының тұрғыны Павлодар қаласындағы колонияда жазасын өтеп жатқан сотталған күйеуіне алты бөтелке шегілмейтін темекі алып келген, – деп хабарлайды Polisia.kz.
34 жастағы астана тұрғыны сотталған күйеуіне ұзақ уақытты кездесуге келген.
Сотталған жазасын Павлодар қаласының №45 мекемесінде 106-бабының 3-бөлімі (Абайсызда адам өліміне әкеп соққан, денсаулыққа қасақана ауыр зиян келтіру) бойынша өтеп жатыр.
Азық-түлік салынған сөмкені тінту кезінде ішінен шегілмейтін темекі салынған алты пластик бөтелке табылды. Сондай-ақ жан-жақты тексеру барысында 5135 теңге көлеміндегі қолма-қол ақша мен флеш-карта тәркіленді.
– Тексеру барысында біз барлық келушілерге тыйым салынған заттарды әкелу жауапкершілігін ескертеміз, олармен де сөйлесеміз. Алайда қабылданған шараларға қарамастан мұндай фактілер тіркеледі, – дейді мекеме басшысы Қуаныш Койчубаев.
Әйелге қатысты ӘҚБтК-нің 481-бабы(Қылмыстық-атқару жүйесiнің мекемелерiнде, арнаулы мекемелерде ұсталатын адамдарға тыйым салынған заттар, бұйымдар мен нәрселер беру) бойынша әкімшілік хаттама толтырылды. Сот отырысында сотталғанның әйелі кінәсін толық мойындады.
