Батыс Қазақстан облысы қылмыстық-атқару жүйесі департаментінің №28 мекемесінде мекеме әкімшілігі мен кешкі мектептің оқытушыларының арасында мазмұнды жұмыс кездесуі өтті, – деп хабарлайды Polisia.kz.
Кездесудің күн тәртібінде сотталғандардың білім алу жағдайларын жақсарту, оқу процесін ұйымдастыру және алдағы білім беру іс-шараларын жоспарлау мәселелері қарастырылды.
Жиын барысында ағымдағы оқу жылына арналған негізгі бағыттар нақтыланды. Студенттердің қажеттіліктеріне бейімделген оқу бағдарламаларын жаңарту мен оқуда қиындықтарға тап болғандарға қолдау көрсетуді күшейту мәселелері талқыланды. Мекеме әкімшілігі сотталғандарға өзін-өзі дамыту және бостандықтағы өмірге дайындалу мүмкіндіктерін кеңейту үшін оқу материалдары мен цифрлық ресурстарға қолжетімділікті қамтамасыз етуге дайын екенін жеткізді.
Тәрбие бөлімінің бастығының міндетін атқарушы Нұржас Қаратаев тәрбие бөлімі мен кешкі мектеп ұстаздарының ынтымақтастығының маңыздылығына тоқталды. Оның айтуынша, білім – сотталғандардың білімі мен дағдыларын дамытумен қатар, олардың өмірге оң көзқараспен қарауына ықпал ететін әлеуметтік бейімделудің маңызды тетігі.
– Біздің басты міндетіміз – сотталғандарға тек білім беру ғана емес, сонымен бірге олардың ойлау жүйесін өзгертуге және болашақтағы өмірге дайындалуға жәрдемдесу. Педагогтар мен әкімшіліктің бірлескен күш-жігері осы мақсатқа жету үшін қажетті жағдайларды жасайды. Бұл бағытта жұмысымызды жалғастыра береміз, – деді Нұржас Қаратаев.
Кездесу барысында сотталғандардың әлеуметтік бейімделуіндегі білім берудің рөліне ерекше назар аударылды. Оқытушылар әрбір студентке жеке көзқараспен қараудың маңыздылығын атап өтті, өйткені бұл олардың оқу мотивациясы мен үлгерімін арттыруға септігін тигізеді. Әкімшілік өз тарапынан табысты білім беру процесін қолдайтын бастамаларды жүзеге асыруға дайын екендіктерін жеткізді.
Мұндай кездесулер мекеменің жұмысында маңызды орын алады, өйткені олар әкімшілік пен педагогтардың күш-жігерін біріктіріп, сотталғандарды босатылғаннан кейін қоғамға сәтті бейімделуіне көмектеседі.
