ШҚО-да Жеңіс күніне арналған плакаттар байқауы өтті, - деп хабарлайды Polisia.kz.
Шығыс Қазақстан облысы бойынша ҚАЖД-ға қарасты №18 мекемесінде Жеңістің 80 жылдығына арналған ерекше мазмұндағы шығармашылық байқау өтті. "Жеңіске 100 күн қалғанда" республикалық акциясы аясында "Алгорим-mix" қоғамдық қоры мен ШҚО бойынша ҚАЖ департаменті ұйымдастырған "Ұрпақтар жады. Жылдар бойы, жүректер арқылы" атты плакаттар байқауы сотталған азаматтар үшін тарихпен рухани үндесу алаңына айналды.
Байқау атауының өзі оның маңызын айқын көрсетеді – ұлы Жеңістің тарихын жүректер арқылы сезініп, оны шығармашылықпен бейнелеу. Іс-шара формалды сипаттан алшақ, басты мақсаты – қатысушыларға ардагерлер ерлігіне тағзым ету мен отансүйгіштік сезімдерін көркем түрде жеткізуге мүмкіндік беру.
Қағаз бен бояуды қолдарына алған қатысушылар өз ойлары мен сезімдерін бейнелеу арқылы батырлықты, ерлікті, бейбіт өмір үшін төгілген тер мен қанның қадірін жүрекпен түсінуге тырысты. Олардың әрбір туындысы – өткенге тағзым, болашаққа аманат.
