Алматы облысында киберполиция мен прокуратура ата-аналар мен мұғалімдерге цифрлық қауіпсіздік негіздерін үйретті
Алматы облысында киберполиция мен прокуратура ата-аналар мен мұғалімдерге цифрлық қауіпсіздік негіздерін үйретті, - деп хабарлайды Polisia.kz.
Алматы облысында киберполиция қызметкерлері мен прокуратура өкілдерінің бірлесуімен педагогтер мен ата-аналардың киберқауіпсіздік саласындағы хабардарлығын арттыруға бағытталған кешенді алдын алу іс-шарасы өткізілді.
Жиынға мектеп мұғалімдері, ата-аналар комитетінің өкілдері және білім беру мекемелерінің әкімшілігі шақырылды. Оның мақсаты – ересектерді қажетті біліммен қамтамасыз етіп, оларды өздерін ғана емес, балаларды да цифрлық ортадағы қауіптілік пен дұрыс мінез-құлық ережелерімен таныстыруға дайындау.
Полиция қызметкерлері күнделікті өмірде кездесетін интернет алаяқтық түрлерін түсіндірді: жалған интернет-дүкендер, "жалған банктер" мен құқық қорғау органдары қызметкерлері атынан жасалатын қоңыраулар, инвестициялық тұзақтар, мессенджерлер мен әлеуметтік желілердегі аккаунттардың бұзылуы, фишингтік хаттар мен вирустық сілтемелер.
– Бүгінде интернет – балалар мен ересектердің өмірінің ажырамас бөлігі. Алайда, ыңғайлылық пен қолжетімділіктің артында айтарлықтай қауіптер бар. Әрбір ата-ана киберқауіптерді тануды және баласы алаяқтық құрбанына айналған жағдайда қандай іс-шаралар қолдану керектігін білуі тиіс, – деп атап өтті киберполиция қызметкерлері.
Кездесу барысында қатысушыларға цифрлық қауіпсіздік тақырыбында арнайы дайындалған бейнероликтер көрсетілді. Полиция мен прокуратура алдану жағдайында нақты іс-қимыл алгоритмін ұсынды және көмек алу жолдарын егжей-тегжейлі түсіндірді. Сонымен қатар барлық қатысушыларға қадамдық нұсқаулықтары бар жадынамалар мен буклеттер таратылды.
Мамандар кәмелетке толмағандар арасындағы алдын алу шараларына ерекше назар аударып, алаяқтардың көбінесе балаларды пайдаланып, отбасы туралы – банк деректері, құпия сөздер мен жеке ақпаратқа қол жеткізетінін еске салды.
Іс-шара соңында ұйымдастырушылар ата-аналар мен педагогтердің цифрлық тәрбиеге белсенді араласуының маңыздылығын ерекше атап өтті. Өйткені баланың интернеттегі қауіпсіздігі – ең алдымен ата-ананың жауапкершілігінде.
