Елімізде азаматтарға паспорттар мен жеке куәліктерді беру бойынша жаңа цифрлық қызмет іске қосылды. Енді құжаттарды алу үшін халыққа қызмет көрсету орталығына барудың қажеті жоқ – бәрі онлайн форматта рәсімделіп, құжат тікелей үйге жеткізіледі, – деп хабарлайды Polisia.kz.
Қарағанды облысында алғашқы болып бұл қызметті пайдаланған азаматтарға құжаттарын облыстық полиция департаментінің бастығы Негмет Исмагулов табыстады.
Алғашқы болып онлайн құжат алғандардың бірі – Анастасия Павлюк өз әсерімен бөлісті.
ХҚКО-да кезек күтіп, уақыт жоғалтпай құжат алу өте ыңғайлы. Барлығы онлайн жасалады, құжатты үйге әкеліп береді. Бұл — өмірімізді жеңілдететін өте жақсы бастама, — деді ол.
Сондай-ақ қызметті пайдаланған Салтанат Жұмағалиева да жаңа жүйенің тиімділігін атап өтті.
Жалпы, жыл басынан бері Қарағанды облысында 14 370 адам құжаттандырылды. Онлайн қызметтің алғашқы күндерінде бұл мүмкіндікті 7 азамат пайдаланды.
Полицейлер тұрғындарды уақытты үнемдеп, мемлекеттік қызметтерді алудың жаңа, заманауи мүмкіндіктерін белсенді қолдануға шақырады.
