Жетісу облысында 100 үлгілі жүргізуші анықталды, – деп хабарлайды Polisia.kz.
Талдықорғанда және бүкіл Жетісу облысында мәдениетті, жауапты әрі заңға бағынатын жүргізушілерді қолдауға бағытталған "Үлгілі жүргізуші" акциясы өтті. Полиция мен жергілікті атқарушы органдар ұйымдастырған бұл шара жолдағы тәртіптің маңызын және әрбір адамның өміріне деген құрметті айқындады.
Шараның басты мақсаты — жол қозғалысы ережелерін қатаң сақтайтын жүргізушінің оң бейнесін қалыптастыру, сондай-ақ барлық жол қозғалысына қатысушылардың құқықтық санасын арттыру. Себебі қауіпсіз жол — әрқайсымыздың саналы таңдауымыздан басталады.
Полиция қызметкерлері қала ішінде көліктерді тоқтатып, тексеріс жүргізді. Жүргізушілердің құжаттары мен соңғы бір жылдағы тәртіп тарихы қаралды — ешқандай заң бұзушылықтың болмауы басты талап болды. Ережені бұзбаған, жол-көлік оқиғасына қатыспаған азаматтарға символикалық сыйлықтар мен алғыс хаттар табысталды. Алғашқы медициналық көмек қобдишасы мен төтенше жағдай құралдары толық жабдықталған жүргізушілер бөлек атап өтілді. Бұл олардың кез келген жағдайда көмек көрсетуге дайын екенін көрсетті.
Облыс бойынша 100 жүргізуші үздік деп танылды. Марапаттау сәті ерекше әсерлі өтті. Көптеген жүргізушілер өз еңбегінің еленгеніне қуанып, зор мақтаныш сезімін білдірді.
Қазақстан Президенті Қасым-Жомарт Тоқаев жол қауіпсіздігін елдің маңызды басымдықтарының бірі екенін үнемі еске салады.
– Әрбір адам өз өмірі мен айналасындағылардың қауіпсіздігі үшін жауапкершілікті сезінуі керек. Әрбір азаматтың, әрбір баланың өмірі – баға жетпес, – деп атап өтті Мемлекет басшысы.
Бұл сөздер "Үлгілі жүргізуші" акциясының рухымен толық үндеседі. Өйткені жолдағы тыныштық пен тәртіптің артында — адамдардың өмірі тұр.
Жетісу облысындағы бұл республикалық акция — жай ғана іс-шара емес, еліміздің жолдарындағы қауіпсіздікті арттыруға және қоғамның жауапкершілік деңгейін көтеруге жасалған маңызды қадам. Өйткені қауіпсіз жол өзімізден басталады.
