Павлодар облысында полиция азаматтардың қауіпсіздігін қамтамасыз етуде, - деп хабарлайды Polisia.kz.
Жаңа жыл мерекелері кезеңінде Павлодар облысының полиция қызметкерлері азаматтардың қауіпсіздігін қамтамасыз етуге және қоғамдық тәртіпті сақтауға ерекше көңіл бөлуде.
Полиция өкілдерінің хабарлауынша, мереке күндері жол қозғалысы қауіпсіздігіне айрықша назар аударылады. Бұл кезеңде көлік қозғалысының қарқыны артып, жол қозғалысына қатысушылардан жол ережелерін қатаң сақтау талап етіледі. Мас күйінде көлік құралын басқаруға қатаң тыйым салынады. Азаматтардың қауіпсіз жүріп-тұруын қамтамасыз ету мақсатында такси немесе жүргізуші қызметтерін пайдалану ұсынылады.
Сонымен қатар пиротехникалық бұйымдарды пайдалану кезінде белгіленген қауіпсіздік талаптарын сақтау қажет. Атап айтқанда, оларды тұрғын үйлерге, көлік құралдарына, жануарларға, балаларға және балалар алаңдарына бағыттауға болмайды. Адамдар көп жиналатын орындарда пиротехниканы қолдануға тыйым салынады. Сондай-ақ пиротехникалық құралдарды кәмелетке толмағандардың пайдалануына жол берілмейді. Мұндай бұйымдарды тек арнайы белгіленген орындарда - тұрғын үйлерден кемінде 50 метр қашықтықта орналасқан, ағаштар, электр желілері және өзге де кедергілер жоқ аумақта ғана іске қосуға рұқсат етіледі.
Аталған қауіпсіздік шараларын сақтау азаматтардың өмірі мен денсаулығын қорғауға, төтенше жағдайлардың алдын алуға және мерекелік кезеңде қоғамдық тәртіпті қамтамасыз етуге мүмкіндік береді.
Бұдан бөлек, полиция қызметкерлері қаладағы ойын-сауық орындарында профилактикалық және түсіндіру жұмыстарын жүргізуде. Нысандардың әкімшілігімен қоғамдық тәртіпті сақтау, жанжалдар мен құқық бұзушылықтарға жол бермеу мәселелері бойынша әңгімелер өткізіліп, мекеме персоналының кез келген келеңсіз жағдайға жедел әрекет етуі және келушілерге қоғамдық тәртіп пен мінез-құлық ережелерін түсіндіруі қажеттігіне ерекше назар аударылды.
- Біздің басты міндетіміз — қала тұрғындарының демалысы қауіпсіз әрі тыныш өтуін қамтамасыз ету. Мерекелік шаралар жанжалдар мен құқық бұзушылықтармен қатар жүрмеуі тиіс. Полиция қызметі ең алдымен алдын алу шараларына және мекеме әкімшіліктерімен өзара іс-қимылға бағытталған, - деп атап өтті полиция өкілдері.
Полиция қоғамдық тәртіп пен жол қауіпсіздігін қамтамасыз етуге бағытталған іс-шаралардың тұрақты бақылауда екенін еске салады.
