Ақмола облысында полиция мен құтқарушылар жүздеген адамға көмек көрсетуде, - деп хабарлайды Polisia.kz.
Ақмола облысы үшінші күн қатарынан қатты боран мен қалың қардың құрсауында қалды. Қолайсыз ауа райы өңірдегі жол қозғалысын едәуір қиындатып, бірқатар тас жолдарда көлік қозғалысы шектелді. Кейбір жүргізушілер мен жолаушылар қар құрсауында қалып, көмекке мұқтаж болды.
Осындай күрделі жағдайда полиция қызметкерлері, құтқарушылар және жол қызметтері тәулік бойы жұмыс істеуде. Олар қар құрсауында қалған көліктерге көмектесіп, жүргізушілер мен жолаушыларды қауіпсіз жерге жеткізу үшін ілестіріп жүру ұйымдастырып жатыр. Сонымен қатар трассаларда ұзақ уақыт тоқтап қалған көліктерді іздеу жұмыстары да жүргізілуде.
Оқиғалардың бірінде Зеренді ауданындағы ауылдардың бірінде тұратын бала аппендицитке күдікпен медициналық мекемеге жете алмай қалған. Ауа райының күрт нашарлауына байланысты жол жабылып, жағдай қиындаған. Полиция мен төтенше жағдайлар қызметінің көмегімен бала дер кезінде медициналық мекемеге жеткізіліп, қажетті көмек алды.
Қазіргі уақытта көрсетілген көмектің нақты санын есептеу қиын. Алайда дәл осындай күндері төтенше жағдай қызметтері мен тәртіп сақшыларының жұмысы қаншалықты маңызды екені айқын көрінуде.
Боран салдарынан кейбір мектеп оқушылары да үйлеріне жете алмай қалған. Ақсу кентіндегі мектеп директоры полициядан көмек сұраған. Нәтижесінде патрульдік полиция экипажы жолға шығып, қарлы боран мен нөлге жуық көріну жағдайына қарамастан шамамен 25 шақырым жол жүріп, оқушыларды үйлеріне аман-есен жеткізді.
Балалардың ата-аналары тәртіп сақшыларына қиын жағдайда қол ұшын созып, балалардың қауіпсіздігін қамтамасыз еткені үшін алғыстарын білдірді.
Полиция қызметкерлерінің айтуынша, дәл осындай күрделі күндері адамдардың өзара қолдауы ерекше сезіледі. Тұрғындардың алғыс сөздері қызметкерлерге жұмысты жалғастырып, халыққа көмек көрсетуге үлкен мотивация береді.
Тәртіп сақшылары өңір тұрғындарына ауа райы қолайсыз кезде алыс жолға шықпауға кеңес береді. Егер жолда қиын жағдайға тап болсаңыз немесе көмек қажет болса, 102 немесе 112 арнайы желілеріне хабарласу керек.
