Абай облысында пробация қызметінің есебінде тұрған азаматтарды жұмыспен қамтуға бағытталған бос жұмыс орындары жәрмеңкесі өтті, – деп хабарлайды Polisia.kz.
Абай облысында халықты жұмыспен қамтуға жәрдемдесу және жұмыссыздық деңгейін төмендетуге бағытталған кезекті бос жұмыс орындары жәрмеңкесі өтті. Іс-шараны "Семей қаласының Мансап орталығы" КММ ұйымдастырды. Жәрмеңке жұмыс берушілер мен жұмыс іздеушілердің тікелей байланыс орнатуына тиімді алаң болды.
Іс-шараға өнеркәсіп, құрылыс, көлік, қызмет көрсету салалары және басқа да негізгі экономикалық бағыттарды қамтитын 20-дан астам кәсіпорын мен ұйым қатысты. Жәрмеңке барысында әлеуметтік тұрғыдан осал санаттағы азаматтарға ерекше көңіл бөлінді.
Қатысушылардың қатарында пробация қызметінің есебінде тұрған 50-ге жуық сотталған азамат болды. Жұмыс іздеушілер бос жұмыс орындарымен танысып, алғашқы сұхбаттан өтіп, сондай-ақ жұмыспен қамту саласындағы мамандар мен заңгерлердің кеңесін алды. Қатысушыларға жұмысқа орналасу тәртібі, кәсіптік оқыту мүмкіндіктері және мемлекеттік қолдау шаралары түсіндірілді.
Жәрмеңке қорытындысы бойынша пробация қызметінің есебінде тұрған төрт азаматқа қаладағы түрлі ұйымдарға жұмысқа орналасу үшін жолдама берілді.
— Жұмысқа орналасу — құқық бұзушылық жасағаннан кейін пробация есебінде тұрған азаматтардың сәтті бейімделуінің негізгі факторларының бірі. Біз олардың әрқайсысына тұрақты жұмыспен қамтылуға мүмкіндік беру және заңға бағынатын өмір салтына қайта оралуы үшін жүйелі жұмыс жүргізіп келеміз. Бос жұмыс орындары жәрмеңкелеріне қатысу олардың жұмыс берушілермен тікелей байланыс орнатуына мүмкіндік беріп, жұмысқа орналасу ықтималдығын арттырады, — деп атап өтті Затон аудандық пробация қызметі бөлімінің бастығы Ерік Усербаев.
