Абай облысының ҚАЖ мекемесінде республика өңірлерінің кіреберіс белгілеріне арналған конструкциялар дайындалады, — деп хабарлайды Polisia.kz.
Абай облысы бойынша ҚАЖ орташа қауіпсіздік мекемесінде металл конструкцияларын дайындайтын цех жұмыс істейді. Мұнда 20-ға жуық сотталған еңбек етеді. Цехта жеке тұрғын үйлерге арналған қоршаулар, ауыл шаруашылығына қажетті жабдықтар және басқа да металл конструкциялар дайындалады.
Қазіргі уақытта цехта республика өңірлерінің кіреберіс белгілеріне арналған стелалар мен көлемді металл әріптер дайындау бойынша тапсырыс орындалуда. Бүгінде жұмысшылар Шығыс Қазақстан облысының кіреберіс белгісіне арналған әріптерді, сондай-ақ Абай облысының өңірлеріне арналған төрт белгіні дайындауда. Бір өңірдің атауын дайындауға шамамен екі апта уақыт жұмсалады.
Сотталғандардың еңбегіне атқарылған жұмыстың көлемі мен сапасына тікелей байланысты кесімді ақы төленеді. Еңбекпен тапқан қаражаттары сот шешімімен белгіленген талап-арыздық міндеттемелерін өтеуге, сондай-ақ отбасы мен жақындарына материалдық көмек көрсетуге мүмкіндік береді.
— Біз үшін сотталғандардың жай ғана жұмыспен қамтылуы емес, бостандыққа шыққаннан кейін қажет болатын нақты дағдыларды меңгеруі маңызды. Бүгінде олар күрделі тапсырыстарды орындап, металмен жұмыс істеуді, технологиялық талаптарды сақтауды және өз жұмысының нәтижесіне жауапкершілікпен қарауды үйренуде. Сонымен қатар ресми еңбек қызметі оларға табыс табуға, талап-арыздық міндеттемелерін өтеуге және отбасыларына қолдау көрсетуге мүмкіндік береді. Көптеген сотталғандардың жұмысқа қызығушылық танытып, кәсіби шеберліктерін арттыруға ұмтылып жатқанын көріп отырмыз. Қазіргі уақытта өндірістік цех тапсырыстарды орындауды жалғастырып, шығарылатын өнім түрлерін кеңейтуде. Сотталғандар үшін мұндай жұмыс тек табыс көзі ғана емес, сонымен қатар мамандық пен еңбек дағдыларын меңгеріп, қоғамға қайта оралуға дайындалуға мүмкіндік береді, — деді сотталғандардың еңбегін ұйымдастыру жөніндегі бөлім бастығы Куанышбек Туканов.
— Мен 41 жастамын. Алматы қаласының тұрғынымын. Бас бостандығынан айырылғанға дейін кәсіпкерлікпен айналыстым, алайда қателік жасап, қазіргі уақытта сол әрекетім үшін жауапкершілік өтеп жатырмын. Үйде мені жұбайым және төрт кәмелетке толмаған балам күтіп отыр. Сондықтан жұмыс істеуге және отбасыма көмектесуге мүмкіндік болуы мен үшін өте маңызды.
Осы цехқа жұмысқа келген кезде металмен жұмыс істеуді көп білмейтінмін. Біртіндеп үйреніп, жаңа дағдыларды меңгердім. Қазір өз еңбегімнің нәтижесін көру маған қызықты. Біз өңірлердің кіреберіс белгілеріне арналған үлкен металл әріптерді дайындаймыз және бұл конструкциялардың жол бойына орнатылатынын түсінемін. Кейде бостандыққа шыққаннан кейін жолмен келе жатып, өз қолыммен жасаған өңір атауын көрсем қандай ерекше сезім болатынын елестетемін. Осы жерде өткізген уақытымның босқа өтпеуі керек екенін түсінемін. Бостандыққа мамандық пен жаңа дағдыларды меңгеріп шыққым келеді. Бұл маған өмірімді қайта бастауға, еңбек етуге және отбасымды қамтамасыз етуге көмектеседі, — деді сотталған азамат.
