Абай облысында полицейлер орталық алаңда тұрғындарға мерекелік концерт өткізді, – деп хабарлайды Polisia.kz.
23 маусым – Қазақстан полициясы күніне орай Абай облысының полицейлері қала тұрғындары мен қонақтарына ерекше мерекелік көңіл-күй сыйлады. Орталық саябақта ұйымдастырылған салтанатты концерт көпшілікке тәртіп сақшыларының қызметтен бөлек, өнерге де жақын, жан-жақты тұлғалар екенін көрсетті.
Мерекелік шара барысында патриоттық әндер шырқалып, әсерлі музыкалық қойылымдар ұсынылды. Сахна төрінде өнер көрсеткен полиция қызметкерлері өздерінің шығармашылық қабілеттерін паш етіп, көрермендердің ыстық ықыласына бөленді. Әрбір ән мен композициядан туған елге деген сүйіспеншілік, Отан алдындағы адал қызмет пен жауапкершілік сезілді.
Концертке жиналған жұртшылық көтеріңкі көңіл-күймен өнерпаздарды қолдап, ыстық лебіздерін білдірді. Мерекелік кештің атмосферасы тұрғындарға ерекше әсер сыйлап, полиция қызметкерлерінің халықпен етене жақын екенін тағы бір мәрте айқындады.
– Біз полицейлерді көбіне қоғамдық тәртіпті қамтамасыз етіп жүрген сәттерде көреміз. Ал бүгін олардың өнерлі, шығармашыл әрі жан-жақты тұлға екенін тамашаладық. Концерттен ерекше әсер алдым. Әрбір қойылым жүрекке жетіп, мерекелік көңіл-күй сыйлады. Осындай шаралар халық пен полиция арасындағы байланысты одан әрі жақындастырып, тәртіп сақшыларына деген құрметті арттыра түседі. Барша полиция қызметкерлеріне мықты денсаулық, қызметтеріне табыс тілеймін, – деді қала тұрғыны.
Айта кету керек, полиция қызметкерлері күн сайын азаматтардың қауіпсіздігі мен қоғам тыныштығын қамтамасыз ету жолында аянбай еңбек етеді. Ал кәсіби мереке қарсаңында ұйымдастырылған бұл концерт олардың қызметтік міндетпен қатар рухани құндылықтарды дәріптеуге де ерекше мән беретінін көрсетті.
Қазақстан полициясы күніне арналған бұл мерекелік кеш халық пен тәртіп сақшылары арасындағы өзара сенім мен сыйластықтың жарқын көрінісіне айналып, көрермендердің жадында ұзақ сақталатын ерекше шара болды.
Тәртіп пен қауіпсіздіктің күзетінде жүрген жандардың еңбегі әрдайым құрметке лайық. Ал олардың өнер арқылы халыққа қуаныш сыйлауы – мерекенің маңызын арттыра түскен тағылымды бастама болды.
