Абай облысы бойынша ҚАЖ мекемелерінің сотталғандары сұранысқа ие мамандықтарды меңгеру мүмкіндігіне ие болды, - деп хабарлайды Polisia.kz.
Абай облысы бойынша ҚАЖ жүйесінің орташа қауіпсіздік мекемесінің қызметкерлері Семей қаласындағы колледждердің бірінің өкілдерімен жұмыс кездесуін өткізді. Кездесудің негізгі тақырыбы – сотталғандарға қысқа мерзімді кәсіптік курстар ұйымдастыру мәселесі болды.
Іс-шараның мақсаты – сотталғандарға еңбек нарығында сұранысқа ие мамандықтарды меңгеруге, практикалық дағдыларды игеруге және жазасын өтеп шыққаннан кейін жұмысқа орналасу мүмкіндіктерін арттыруға жағдай жасау. Кездесу барысында сотталғандарды кәсіптік даярлау, қысқа мерзімді оқыту бағыттары, оқу процесін ұйымдастыру тәртібі, сондай-ақ практикалық сабақтар өткізу мүмкіндіктері талқыланды.
Кездесу қорытындысы бойынша сотталғандарға еңбек нарығында сұранысқа ие келесі мамандықтар бойынша қысқа мерзімді кәсіптік курстардан өту мүмкіндігі қарастырылды: машина жасау технологиясы, дәнекерлеу ісі, тігін өндірісі және киімді модельдеу, аспаз және наубайшы.
– Кәсіптік оқыту – босатылғаннан кейін сұранысқа ие болатын нақты білім мен дағдыларды алуға мүмкіндік береді. Біз сапалы даярлықты ұйымдастырып, оқытудың практикалық бөлігіне ерекше көңіл бөлуге дайынбыз. Мамандықты меңгеру сотталғандарға болашақта жұмыс табуға, еңбек нарығында сұранысқа ие маман болуға және өмірлерінің жаңа кезеңін бастауға мүмкіндік береді, – деді колледж басшысы Аскар Нургожин.
– Біздің міндетіміз – сотталғандардың еңбекпен қамтылуын қамтамасыз етумен ғана шектелмей, оларды босатылғаннан кейінгі өмірге дайындау. Мамандық пен практикалық дағдыларды меңгеру жұмысқа орналасу мүмкіндігін айтарлықтай арттырады. Біз сотталғандардың жазасын өтеу уақытын өздері мен отбасылары үшін пайдалы өткізуіне мүдделіміз. Кәсіптік курстар оларға болашақта өз бетінше өмір бастауға және қоғамға қайта оралуға көмектесетін мамандықты меңгеруге мүмкіндік береді.
Қысқа мерзімді кәсіптік курстарды ұйымдастыру сотталғандарды қайта әлеуметтендіру бағытындағы жұмыстардың бірі болмақ. Алынған білім мен біліктілік оларға жазасын өтегеннен кейін жұмыс табуға, өзін және отбасын қамтамасыз етуге және қоғамдағы толыққанды өмірге қайта оралуға мүмкіндік береді, – деп атап өтті сотталғандардың еңбегін ұйымдастыру бөлімінің бастығы Куанышбек Туканов.
