Ақтау қаласында ұрпақтар сабақтастығын нығайтуға бағытталған маңызды тарихи-мәдени іс-шара өткізілді, — деп хабарлайды Polisia.kz.
Маңғыстау облысы полиция департаментінің қолдауымен тұңғыш қазақ генералы — Шәкір Жексенбаевтың жеке заттарын туған жеріне қайтару бойынша маңызды бастама жүзеге асырылды. Осы жұмыс аясында өңірдің ғылыми және шығармашылық зиялы қауым өкілдерінен құралған делегация Мәскеу қаласына барып, генералдың туыстарымен кездесті.
Кездесу барысында көп жыл бойы отбасыда сақталып келген жеке бұйымдар, тарихи материалдар және естелік заттар табысталды.
Жеткізілген құнды жәдігерлер облыстық Әбіш Кекілбаев атындағы тарихи-өлкетану музейінің қорына салтанатты түрде тапсырылды. Бұл қадам ел тарихын сақтау және еліміздің көрнекті тұлғаларының мұрасын кеңінен насихаттауға қосылған маңызды үлес болды.
Іс-шара аясында музейде ұрпақтар сабақтастығына және Маңғыстау өңірінен шыққан генералдарға арналған жаңа экспозиция ашылды. Көрмеге генерал-майор Сағындық Аяғановтың және генерал-майор Мұхтар Қожаевтың жеке заттары мен марапаттары қойылды. Олар Отанына адал қызмет етудің жарқын дәстүрін жалғастырған тұлғалар ретінде ұсынылды.
Осылайша, жүзеге асқан жоба тарихи сабақтастықтың символына айналды — тұңғыш қазақ генералы Шакір Жексенбаевтан бастап қазіргі заманғы құқық қорғау саласының басшыларына дейінгі үзілмеген байланыс көрініс тапты.
Өткізілген іс-шаралар Маңғыстау облысы полиция департаментінің тек қоғамдық тәртіпті қамтамасыз етудегі ғана емес, сонымен қатар өңірдің мәдени-тарихи мұрасын сақтаудағы маңызды рөлін айқындады.
