Павлодар облысында түнгі тыныштықты бұзуға қарсы бақылау күшейтілді. Жыл басынан бері мыңнан астам тұрғын жауапкершілікке тартылып, полиция "нөлдік төзімділік" саясатын ұстанып отыр, – деп хабарлайды Polisia.kz.
Біреулер жұмыс күнінен кейін демалып, күш жинауға тырысса, енді біреулер өздерінің музыкасы немесе жөндеу жұмыстары өзгелердің тыныштығынан маңызды деп санайды. Алайда статистика Павлодар облысында түнгі шуды бұзушыларға қатысты қатаң шаралар қолданылып жатқанын көрсетеді.
Жыл басынан бері тыныштықты бұзғаны үшін 1313 азамат жауапкершілікке тартылған.
Тыныштықты бұзу — жай ғана қолайсыздық емес. Бұл көршілердің, қарттардың және кішкентай балалары бар отбасылардың мазасын алады. Заңда нақты талаптар белгіленген: түнгі тыныштықты сақтау — әр азаматтың міндеті.
— Еске сала кетейік, заңнамаға сәйкес жұмыс күндері сағат 22:00-ден таңғы 09:00-ге дейін, ал демалыс және мереке күндері 23:00-тен 10:00-ге дейін тыныштық сақталуы тиіс. Ережені бұзғандарға алдымен ескерту жасалады, ал қайталанған жағдайда әкімшілік жауапкершілікке тартылады, – деп атап өтті Павлодар облысының полиция департаменті.
Полиция тұрғындарды өзара сыйластыққа шақырады. Басқалардың демалысы мен ұйқысына құрметпен қарау — әркімнің міндеті. Ал құқық бұзушылық болған жағдайда, дереу "102" нөміріне хабарласу қажет.
