Қарағандылық полицейлер жергілікті сауда үйлерінің бірінен ұрлық жасаған азаматты ұстады, – деп хабарлайды Polisia.kz.
9 қазан күні Қарағанды қалаcы Полиция басқармасының қызметкерлері қала орталығында рейдтік іс-шаралар өткізу кезінде қаладағы сауда үйлерінің бірінің маңында қолында қорабы бар асығыс, жан-жағына үрке қарап, жүгіре басып бара жатқан азаматты байқаған.
Полиция қызметкерлері күдік тудырған азаматты тоқтатып, мән-жайды сұрастыра бастағанда оларды сауда үйінің өкілі қуып жеткен.
Тексеру барысында ұсталған азаматтың сауда үйінен құны 60 мың теңге тұратын электрлік грильді ұрлап әкеткені белгілі болды.
Күдіктінің Балқаш қаласының 38 жастағы тұрғыны екені анықталды.
Аталған факт бойынша Қазақстан Республикасы Қылмыстық Кодексінің 188-бабына (Ұрлық) сәйкес қылмыстық іс қозғалып, тергеу амалдары жүргізілуде.
