Қазақстан мен Өзбекстан Ұлттық ұландарының қолбасшылары ынтымақтастық мәселелерін талқылады, – деп хабарлайды Polisia.kz.
Өзбекстан Республикасы Ұлттық ұланының қолбасшысы генерал-майор Рустам Джураев бастаған Өзбекстан Республикасы Ұлттық ұланы делегациясының еліміздегі жұмыс сапары аяқталды.
29 маусым күні бауырлас республиканың әскери делегациясы Қазақстан Республикасы Ұлттық ұланының Жоғары қолбасшылығында болды. Олардың Қазақстан Республикасы Ұлттық ұланының басшылығымен кездесуі кезінде брифинг өткізіліп, онда Ұлттық ұланның Бас қолбасшысы генерал-лейтенант Руслан Жақсылықов қонақтарға құрылым туралы, атқарылған міндеттері мен әскердің даму перспективалары жайлы егжей-тегжейлі айтып берді. Сонымен қатар қоғамдық қауіпсіздік пен құқықтық тәртіпті қамтамасыз ету саласында бірлескен жаттығулар (тренингтер) өткізу, қос тарап ұйымдастырған спорттық жарыстарға екі жақ ведомстволары өкілдерінің қатысуы сияқты мәселелер қаралды.
Кездесуде делегация басшысы генерал-майор Рустам Джураев қазақ-өзбек қатынастары терең тарихи тамыры мен ортақ рухани құндылықтары бар біздің халықтарымыздың достығы мен бауырластығынан күш алатындығын атап өтті.
Елордадағы іс-сапар барысында өзбекстандық әскерилер Қазақстан Республикасы Ұлттық ұланының астаналық жедел бригадасында болды. Қонақтарға әскери қалашықтың инфрақұрылымы, әскери техникасы мен қару-жарақ үлгілері, сондай-ақ басқа да нысандар көрсетілді.
Делегацияның жұмыс сапары оңтүстік астанада аяқталды, онда Өзбекстаннан келген әскерилер Ішкі істер минитсрлігі мен Ұлттық ұлан арнайы жасақтарының Жауынгерлік-әдістемелік даярлау орталығының мүмкіндіктерімен танысты.
Сапар барысында Қазақстан Республикасы Ұлттық ұланының Әскери институты мен Өзбекстан Республикасы Ұлттық ұланының Әскери-техникалық институты арасында Ынтымақтастық Меморандумын жасау мәселесі де пысықталды.
