Қырғыз азаматы жолда көмек көрсеткен Павлодар облысының полицейлеріне алғыс айтты, – деп хабарлайды Polisia.kz.
Павлодар облысы Полиция департаментінің бастығы Василий Склярдың атына Қырғызстан Республикасы Бішкек қаласының тұрғыны Расулбек Дүйшеновтің алғысы келіп түсті.
– Успен ауданы полиция бөлімінің басшылығына полицейлердің жауаптылығы мен кәсібилігі үшін көп рақмет. Атап айтқанда, Қозыкеткен ауылдық округінің учаскелік полиция инспекторының көмекшісі Олжас Есжановқа адамдарға мейірімді және жанашыр көзқарасы үшін алғысымызды білдіреміз, – деп жазды Расулбек Дүйшенов.
Сол күні түстен кейін Олжас Есжанов әдеттегідей әкімшілік учаскені патрульдеді. Жолдың шетінде Ковалевка ауылының жанында ол жүк көлігін байқады. Полицей жүргізушіден “Бәрі жақсы ма және қандай да бір көмек қажет пе?” деп сұрады. Оған ер адам ағасымен бірге Қырғызстаннан Ресейге тауар тасып жүргенін және көлікте ақау болғанын айтты. Бірақ көмек қажет емес, өйткені оның ағасы қалаға қосалқы бөлшектерді алу үшін кеткенін және жақын арада мәселе шешілетінін жеткізді.
Полиция қызметкері жолаушыға телефон нөмірін қалдырып, қажет болған жағдайда қоңырау шалу керектігін ескертті. Сол күні кешке жүргізуші Олжасқа қоңырау шалып, келуді өтінді.
Көшеде қараңғы және өте суық болды, қатты аяз түсті. Жүргізушінің ағасы қажетті қосалқы бөлшекті әкелгеніне қарамастан, мұндай жағдайда ашық далада көлікті жөндеу мүмкін болмады. Сонымен қатар жолаушылардың айтуынша, өте төмен температурада үсіп кетуі мүмкін алмалар бар екен.
Көмек көрсету үшін Олжас Есжанов дереу жүргізушіге барды. Полиция қызметкері “ЧКУ” шаруа қожалығының басшысы Сергей Черевкомен Ковалевка ауылында келісіп, жүк көлігіне жылы бокс ұсынды. Көлікті түнде жылы боксқа кіргізіп, учаскелік полицияның көмекшісі ер адамдарға демалу және жылыну үшін ұйықтайтын орындарды қамтамасыз етті.
