Шахтинскіде ұры тұрғынның пәтерінен 1,4 млн теңге мен бағалы заттарды үптеп кетті, – деп хабарлайды Polisia.kz.
26 қарашада Қарағанды облысы Шахтинск қаласының полиция бөліміне 49 жастағы қала тұрғыны арызданған. Жәбірленуші әйелдің айтуынша, белгісіз біреу пәтерден алтын бұйымдары мен 1,4 млн. теңге ақшасын ұрлап кеткен. Оқиға орнына жедел-тергеу тобы келіп, тексеру барысында полицейлер ұрының балалар бөлмесінің терезесі арқылы кіргенін анықтады.
Жедел-іздестіру іс-шаралары барысында тәртіп сақшылары күдікті – 38 жастағы ер адамды анықтап, ұстады. Күдікті қылмысын мойындады. Айғақты заттар алынды.ҚР Қылмыстық кодексінің 188-бабы (Ұрлық) бойынша қылмыстық іс қозғалды. Қазіргі уақытта тергеу амалдары жүргізілуде. Күдікті уақытша ұстау изоляторына қамалды.
