Дуальды оқыту аясында Қазақстан-Америка еркін университетінің студенттері Шығыс Қазақстан облысы полиция департаментінің қызметкерлерімен кездесті, – деп хабарлайды Polisia.kz.
ШҚО ПД анықтау басқармасының бастығы Арман Үмітов құқықтану факультетінің 4-курс студенттеріне сабақ өткізді. Болашақ заңгерлер заңнамадағы соңғы өзгерістермен, оның ішінде тұрмыстық зорлық-зомбылыққа қарсы іс-қимыл және жәбірленушілердің құқықтарын қорғау салаларындағы жаңашылдықтармен танысты.
Теориядан тәжірибеге көшіп, қатысушылар сотқа дейінгі тергеп-тексерудің қалай жүргізілетінін, қылмыстық қудалау органдарының немен айналысатынын және тергеу бөлімшелерінің заңды қамтамасыз ету мен азаматтардың құқықтарын қорғаудағы рөлін талқылады.
Кездесудің тағы бір маңызды бөлігі – мамандықтың болашағына арналды. Студенттерге университетті аяқтағаннан кейін ішкі істер органдарына қызметке орналасу, кәсіби өсу және тергеу бөлімшелеріндегі мансаптық мүмкіндіктер туралы айтылды.
Мұндай кездесулер болашақ мамандарға оқу кезінде-ақ кәсіби қызметтің қыр-сырын ішінен көруге және заң саласындағы білімнің тәжірибеде қалай қолданылатынын түсінуге керемет мүмкіндік.
