Шымкентте алаяқтықпен алған ақшасын құмар ойынға тіккен әйел сотталды, – деп хабарлайды Polisia.kz.
Абай АПБ-ға жергілікті тұрғын алаяқтың құрбаны болғаны жөнінде шағымданды. Ол өз арызында интернеттегі ақшаңызды 10 күнде 50%-ға көбейтіп беремін деген жылтыр жарнамаға сеніп қалғанын жеткізді.
Жәбірленуші алған ақпараттың рас-өтірігіне көз жеткізу мақсатында қала аумағында бейтаныс келіншекпен кездескен. Ол берген ақшасын 10 күн ішінде көбейтіп беретініне сендіріп, өзінің банктік есеп шотына 1 290 000 теңге аударым жасатып, “ізін суытқан”. Уәде етілген мерзім өткен соң, күдікті телефонға жауап бермей, із-түссіз жоғалғанда ғана әйел алаяққа алданғанын түсінген.
Тәртіп сақшылары аталған жайтты ҚР ҚК-нің 190-бабы 1-бөлігі (Алаяқтық) бойынша тіркеді. Күдіктінің жеке басын, 27 жастағы Түркістан облысының тумасын анықтады.
Тергеу барысында күдікті бұған дейін осыған ұқсас қылмыс жасағаны үшін сотты болғаны анықталды. Сондай-ақ алаяқтық жолмен иемденген қаржысын құмар ойынға тігіп, ұтылып қалғаны белгілі болды.
Сот отырысында айыпталушы өз кінәсін мойындап, жәбірленушіге келтірген шығынды толық өтегенін жеткізді. Сәйкесінше, сот оған қатысты 3 жылға бас бостандығын шектеу жазасын тағайындады.
