Полиция майоры Жалғасбай Әбшекеновтің кәсіби жолы қызметтегі тәжірибе мен спорттағы жетістіктерден ғана тұрмайды. Астана қаласы полиция департаментінің аса маңызды істер жөніндегі жедел уәкілі үшін тәртіп, сабырлылық пен жауапкершілік – бала кезден қалыптасқан өмірлік ұстаным. Бүгінде сол қасиеттер оның қызметінде де, спорттағы жетістіктерінде де көрініс тауып келеді, – деп хабарлайды Polisia.kz.
Жалғасбай Қызылорда қаласында дүниеге келген. Құқық қорғау органдарындағы қызмет оның өмірінде кездейсоқ таңдау болған емес. Бұл – бала кезден армандаған мамандығы әрі біртіндеп мақсатқа айналып, сол жолға табандылықпен ұмтылған бағыты.
Оның өмірлік ұстанымдарының қалыптасуына отбасының ықпалы зор болды. Әкесі судья болып қызмет еткен, ал ағасы да өмірін құқық қорғау саласымен байланыстырған. Олар Жалғасбай үшін кәсіби жауапкершіліктің, халыққа қызмет етудің алғашқы үлгісі болды.
Ол ішкі істер органдарындағы қызметін 2014 жылы бастады. Қызметінің алғашқы жылдарынан-ақ тек теория арқылы меңгеру мүмкін емес тәжірибеге ие болды. Адамдармен тіл табысу, әртүрлі жағдайларға дұрыс жол табу, қандай жағдайда да сабырлылық сақтау және қабылдаған шешімдері үшін жауапкершілік алу – оның кәсіби жолының ажырамас бөлігіне айналды.
Уақыт өте келе оның кәсіби жолы ұйымдасқан қылмысқа қарсы күрес басқармасына алып келді. Көптеген жедел уәкіл үшін ұйымдасқан қылмысқа қарсы күрес басқармасындағы қызмет – кәсіби тұрғыдан маңызды бағыттардың бірі. Бұл салада әсіресе ұстамдылық, сараптамалық ойлау, батылдық және командалық жұмыс айрықша маңызға ие.
Оның айтуынша, білікті жедел уәкіл сыни ойлай білуі, жағдайды жылдам бағалап, дұрыс шешім қабылдауы қажет. Сонымен қатар әрбір әрекет нақты, техникалық тұрғыдан сауатты әрі командалық үйлесіммен орындалуы тиіс.
– Біздің жұмысымызда тек жылдам әрекет ету жеткіліксіз. Жағдайды талдай білу, ұсақ-түйекке дейін мән беру және қандай әрекеттің дұрыс болатынын түсіну қажет. Әрине мұнда команданың да маңызы өте зор, – дейді полиция майоры.
Көп жылғы қызмет барысында сабырлы болу Жалғасбайдың басты қасиеттерінің біріне айналды. Жедел уәкіл үшін күтпеген жағдай – зейінді жоғалтудың себебі емес, керісінше, шешімін табуды қажет ететін міндет. Уақыт өте келе бұл қасиет оның кәсіби мінезінің ажырамас бөлігіне айналған.
Жалғасбай өз жұмысын шын мәнінде жақсы көретінін айтады. Ол үшін күрделі қызметтік міндеттер – өзін сынап көруге, жаңа тәжірибе жинақтауға және бірлескен еңбектің нәтижесін көруге мүмкіндік.
Оның өмірінде спорттың да орны ерекше. Ол қоян-қолтық ұрыстан, джиу-джитсудан, панкратионнан және грэпплингтен ел чемпионы атанған. Жалпы, Қазақстан Республикасының тоғыз дүркін чемпионы, Қазақстан Республикасы кубогының тоғыз дүркін чемпионы, 2010 жылы Белградта өткен әлем чемпионатының екі дүркін қола жүлдегері, сондай-ақ 2011 жылы Анапа қаласында және 2012 жылы Сегедте өткен әлем кубоктарының жеңімпазы. Бұл жетістіктердің негізінде жылдар бойғы тәртіп, табандылық пен тынымсыз еңбек жатыр.
Бүгінде спорт оның өмірінің ажырамас бөлігіне айналған. Ол жүзу, жүгіру, грэпплинг, джиу-джитсу, қоян-қолтық ұрыс және жекпе-жек өнерінің басқа да түрлерімен айналысады. Ол үшін жаттығу – тек физикалық дайындық емес, ойды ретке келтіріп, күнделікті қарбаластан арылуға және ішкі тепе-теңдікті сақтауға мүмкіндік беретін уақыт.
Қызығы, Жалғасбай қызметте де, спортта да көмектесетін қасиеттерін ең алдымен тәрбиемен байланыстырады. Әкесі оның бойына бала кезінен жауапкершілік, парыз және тәртіп сезімін сіңірген. Оның жадында ерекше сақталған сөздердің бірі – даңқты қолбасшы Бауыржан Момышұлының "Тәртіпке бағынған құл болмайды" деген нақылы. Бұл сөз Жалғасбай үшін жай ғана дәйексөз емес, өмірлік ұстанымға айналған. Тәртіп, жауапкершілік және адамдарға деген құрмет – оның қызметте берік ұстанатын қағидалары.
Қызметі мен спорт залынан тыс уақытта Жалғасбай үшін отбасының орны ерекше. Жұбайымен бірге үш баланы тәрбиелеп отыр. Отбасы – оған қолдау көрсетіп, күш-қуат беретін, кәсіби жүктемеге қарамастан ішкі тепе-теңдігін сақтауға көмектесетін басты тірегі.
