Түркістан облысында жалған мемлекеттік тіркеу белгісімен жүрген жүргізуші анықталды, – деп хабарлайды Polisia.kz
Қазығұрт аудандық полиция бөлімінің қызметкерлері жол-көлік оқиғаларының алдын алып, құқық бұзушылықты, жол ережесін бұзатын көлік жүргізушілерін анықтау мақсатында “Қауіпсіз жол” профилактикалық шарасын жүргізуде. Осындай рейд барысында тәртіп сақшылары жалған нөмірлі көлікті анықтады. Нақтырақ айтсақ, Газель көлігінің жүргізушісі жанармай құю бекетіне тоқтаған. Көліктің нөміріне күдіктенген полицейлер оның нөмірін тексерді.
Нәтижесінде, жас жігіттің автокөлігіне жалған мемлекеттік тіркеу белгісін пайдаланып жүргені белгілі болды.
Аталған жайтты полиция қызметкерлері ҚР ҚК-нің 386-бабы 1-бөлігі (Көлік құралының сәйкестендіру нөмірін қолдан жасау, жою, көрінеу қолдан жасалған сәйкестендіру нөмірі бар көлік құралын өткізу) бойынша тіркеуге алды.
Тексеру кезінде көлік жүргізушісі нөмірді тауып алып, қызығып таққанын айтты. Оқиғаның толық мән-жайын полиция қызметкерлері тексеруде. Қазіргі таңда жүргізуші жігітке қатысты сотқа дейінгі тергеу амалдары жүргізілуде.
